navarra.es
Castellano | Euskara | Français | English
Ezagutzera eman
Nafarroako Foru Komunitateko Lehendakariaren 10/2011 Foru Dekretua, uztailaren 1ekoa, Nafarroako Foru Komunitateko Administrazioaren departamentuen egitura ezartzen duena
(2011ko 131. NAOn argitaratutako testua, uztailaren 2an)
Atarikoa
Nafarroako Gobernuari eta Lehendakariari buruzko abenduaren 3ko 14/2004 Foru Legearen 30.7 artikuluak ezartzen du Nafarroako Gobernuko lehendakariari dagokiola Nafarroako Foru Komunitateko Administrazioaren departamentuak sortu, aldatu, bateratu eta kentzea, eta bakoitzaren izena eta eskumenen esparrua zehaztea.
Nafarroako Foru Komunitateko Administrazioari buruzko abenduaren 3ko 15/2004 Foru Legearen 19.2 artikuluan ezartzen denez, berriz, Departamentuak sortu, aldatu, bateratu edo kentzea, hala nola departamentu bakoitza eskumeneko jarduera administratiboaren zein sektoretan arituko den finkatzea, Nafarroako Gobernuko lehendakariari dagokio eta foru dekretu bidez egin beharko du.
Nafarroako Gobernuari eta Lehendakariari buruzko abenduaren 3ko 14/2004 Foru Legearen 30.7 artikuluan eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 19.2 artikuluan ezarritakoaren babesean, dekretatu dut:
1. artikulua. Nafarroako Foru Komunitateko Administrazioaren departamentu egitura.
Nafarroako Foru Komunitateko Administrazioa departamentu hauetan antolatzen da:
-Lehendakaritza, Administrazio Publikoak eta Barnea.
-Ekonomia eta Ogasuna.
-Kultura, Turismoa eta Erakunde Harremanak.
-Hezkuntza.
-Osasuna.
-Gizarte Politika, Berdintasuna, Kirola eta Gazteria.
-Landa Garapena, Industria, Enplegua eta Ingurumena.
-Sustapena eta Etxebizitza.
2. artikulua. Lehendakaritzako, Administrazio Publikoetako eta Barneko Departamentuaren eskumenen esparrua.
Lehendakaritzako, Administrazio Publikoetako eta Barneko Departamentuari dagokio Nafarroako Foru Komunitateko Administrazioak honako arlo hauetan bereganatuak dituen eskumenak gauzatzea: Gobernuko Idazkaritza; administrazioa erraztea eta administrazio elektronikoa garatzea; Nafarroako Aldizkari Ofiziala; Foru Komunitatearen aholkularitza juridikoa eta ordezkaritza eta defentsa epaiketetan; Nafarroako Zuzenbidea sustatzea; parte-hartzea eta herritarrentzako arreta; hauteskunde prozesuak; funtzio publikoa; segurtasun politikak; polizia; jokoa eta ikuskizunak; babes zibila eta larrialdietako arreta; Justizia Administrazioa; delituen biktimei laguntzea; delitugileak birgaitu eta gizarteratzea; Nafarroako Toki Administrazioa; bai eta indarra duten xedapenek ematen dizkioten gainerako eskudantziak ere.
3. artikulua. Ekonomia eta Ogasun Departamentuaren eskumenen esparrua.
Ekonomia eta Ogasun Departamentuari dagokio Nafarroako Foru Komunitateko Administrazioak honako arlo hauetan bereganatuak dituen eskumenak gauzatzea: ogasun publikoa, jarduera ekonomikoaren plangintza eta programazioa, aurrekontuen plangintza eta prestakuntza eta kontrol ekonomiko-finantzarioa, politika finantzarioa eta Estatuarekin eta gainerako administrazio publikoekin koordinazio ekonomikoa izatea, ondarea, estatistika; Europako aferak eta haren politikaren jarraipena egitea; bai eta indarra duten xedapenek ematen dizkioten gainerako eskudantziak ere.
4. artikulua. Kulturako, Turismoko eta Erakunde Harremanetako Departamentuaren eskumenen esparrua.
Kulturako, Turismoko eta Erakunde Harremanetako Departamentuari dagokio Nafarroako Foru Komunitateko Administrazioak honako arlo hauetan bereganatuak dituen eskumenak gauzatzea: kultur ondarea babestu eta handitzea; herritarrek kulturarako sarbidea izateko erraztasunak ematea; Nafarroako turismo sektorea antolatu eta bultzatzea; barne merkataritza eta eskulangintza antolatu eta sustatzea; kanpoko merkataritza sustatzea; lehendakariari laguntzea; Parlamentuarekiko eta Foru Komunitateko, autonomia erkidegoetako, Espainiako eta Europako beste erakunde batzuekiko harremanak; Nafarroako Gobernuaren erakunde irudia babestu, garatu eta sustatzea; Europar Batasuneko erakundeetan parte hartzea; informazio politika koordinatzea; hedabideak; immigrazio politiken koordinazioa; Foru Komunitatetik kanpo bizi diren nafarrekiko eta Nafarroako Etxe eta Zentroekiko koordinazioa; bai eta Gobernuaren eledunaren eginkizunak ere.
5. artikulua. Hezkuntza Departamentuaren eskumenen esparrua.
Hezkuntza Departamentuari dagokio Nafarroako Foru Komunitateko Administrazioak honako arlo hauetan bereganatuak dituen eskumenak gauzatzea: unibertsitateko eta unibertsitatez kanpoko irakaskuntza, eta hizkuntza politika; bai eta indarra duten xedapenek ematen dizkioten gainerako eskudantziak ere.
6. artikulua. Osasun Departamentuaren eskumenen esparrua.
Osasun Departamentuari dagokio Nafarroako Foru Komunitateko Administrazioak honako arlo hauetan bereganatuak dituen eskumenak gauzatzea: osasun publikoa, lan osasuna, osasun laguntza eta osasuna babesteari buruzko eskubideak bermatzea; bai eta indarra duten xedapenek ematen dizkioten gainerako eskudantziak ere.
7. artikulua. Gizarte Politika, Berdintasun, Kirol eta Gazteria Departamentuaren eskumenen esparrua.
Gizarte Politika, Berdintasun, Kirol eta Gazteria Departamentuari dagokio Nafarroako Foru Komunitateko Administrazioak honako arlo hauetan bereganatuak dituen eskumenak gauzatzea: familia, kontsumoa, adingabeen babesa, kirola; gazteria; gizonen eta emakumeen arteko berdintasun politikak; garapenerako nazioarteko lankidetza; gizarte gaiak; bai eta indarra duten xedapenek ematen dizkioten gainerako eskudantziak ere.
8. artikulua. Landa Garapen, Industria, Enplegu eta Ingurumen Departamentuaren eskumenen esparrua.
Landa Garapen, Industria, Enplegu eta Ingurumen Departamentuari dagokio Nafarroako Foru Komunitateko Administrazioak honako arlo hauetan bereganatuak dituen eskumenak gauzatzea: nekazaritza, abeltzaintza, elikadura eta landa garapena; ingurumena babestu eta zaintzea; ur baliabideak; industria, energia eta meatzaritza; industria jarduera sustatzea; ikerketa, garapen teknologikoa eta berrikuntza, kalitatea eta lehiakortasuna bultzatzea; informazioaren gizartea garatzea eta informazioaren eta komunikazioaren teknologiak erabiltzea; energiaren eta meategietako baliabideen kontrola; energia berriztagarriak sustatzea; Nafarroako enpresak nazioartera ateratzea; lan harremanak eta ekonomia soziala sustatu eta antolatzea; enplegua lortzeko politika aktiboak eta lan bitartekotza sustatzea; bai eta antolamendu juridikoak ematen dizkion gainerako eskudantziak ere.
9. artikulua. Sustapen eta Etxebizitza Departamentuaren eskumenen esparrua.
Sustapen eta Etxebizitza Departamentuari dagokio Nafarroako Foru Komunitateko Administrazioak honako arlo hauetan bereganatuak dituen eskumenak gauzatzea: Nafarroako errepide sarea proiektatu, gauzatu, zaindu, ustiatu eta defendatzea; interes orokorreko obra hidraulikoak, trenbideetakoak eta aireportuetakoak edo agintzen zaizkion antzeko obrak kudeatzea; geologia eta geoteknia; kartografia; garraioaren arloko politika planifikatu, koordinatu eta gauzatzea, lurraldearen antolamendua eta hirigintza; eraikuntzen kalitatea kontrolatu eta sustatzea; etxebizitza eskuratzeko bideak sustatzea eta etxebizitzetarako lurzoruaren merkatuan esku hartzea; bai eta indarra duten xedapenek ematen dizkioten gainerako eskudantziak ere.
Lehenbiziko Xedapen Gehigarria. Lege erreferentziak.
Indarra duen antolamendu juridikoaren erreferentzia organiko eta funtzionalak Nafarroako Foru Komunitateko lehendakariak emandako foru dekretu honetan ezarritako departamentuei dagozkiela ulertzen da, betiere beren gain hartzen dituzten eskumenen esparruen arabera.
Bigarren Xedapen Gehigarria. Lehentasunak.
Nafarroako Foru Komunitateko lehentasunen araubidearen ondorioetarako, Nafarroako Foru Komunitateko lehendakariak emandako foru dekretu honen 1. artikuluan ezarritakoa izanen da departamentuen ordena.
Lehenbiziko Xedapen Iragankorra. Kreditu egozpena.
1. Nafarroako Foru Komunitateko lehendakariak emandako foru dekretu honek indarra hartzen duenetik 2011ko aurrekontu ekitaldia itxi arte, aurrekontu kredituen egozpen organikoa indarra duen sailkapen organikoaren arabera eginen da, eta Ekonomia eta Ogasun Departamentuak eginen ditu beharrezkoak diren egokitzapenak.
2. Nafarroako Foru Komunitateko lehendakariak emandako foru dekretu honen bidez sortu edo aldatu diren departamentuen aurrekontu xedapenak kasuan kasuko eginkizunak orain arte bete dituzten departamentuetako bidezko kredituei egotziko zaizkie, 2011ko aurrekontu ekitaldia amaitu arte.
Bigarren Xedapen Iragankorra. Birmoldaketak eta egitura organikoak.
1. Nafarroako Foru Komunitateko lehendakariak emandako foru dekretu honen 1. artikuluarekin bat sortu diren edo egungo departamentuen eskumenak beren gain hartu dituzten departamentuen birmoldaketa edo behin betiko egituraketa egin bitartean, horien mendeko unitate organikoak eta entitateak eskumenak jaso dituzten departamentuan sartuko dira eta bertan beteko dituzte beren eginkizunak.
2. Lehendakariaren foru dekretu honetan ezarritakoaren arabera departamentuen birmoldaketa egin bitartean, Idazkaritza Tekniko Nagusiek eta horien mendeko unitate organikoek kasuan kasuko eskumenak jaso dituzten departamentuetan beteko dituzte beren eginkizunak, dagozkien arloetan. Idazkaritza Tekniko Nagusi horiek gaur egun duten izena eta eskumenak izaten jarraituko dute, harik eta Idazkaritza Tekniko Nagusi bakar bat egituratu arte departamentu bakoitzean eta haien titularrak izendatu arte.
Hirugarren Xedapen Iragankorra. Laguntza eta lankidetza.
Nafarroako Foru Komunitateko lehendakariak emandako foru dekretu honetan adierazten den konfigurazio berriaren araberako departamentuen egiturak onesten ez diren bitartean, bai eta aurreragoko garapenari begira ere, departamentu guztiek laguntza emanen diote elkarri eta behar den sostengua jarriko dute besteen eskura lehenbailehen eta eraginkortasunez ezarri eta lanean has daitezen.
Xedapen Indargabetzaile Bakarra. Arauak indargabetzea.
Indarrik gabe geldituko dira Nafarroako Foru Komunitateko lehendakariak emandako foru dekretu honen kontrakoak diren maila bereko edo apalagoko xedapen guztiak eta, bereziki, Nafarroako Gobernuko lehendakariaren 12/2007 Foru Dekretua, abuztuaren 16koa, Nafarroako Foru Komunitateko Administrazioaren departamentuen egitura ezarri zuena.
Azken Xedapenetako Lehena. Gaikuntzak.
Lehendakaritzako, Administrazio Publikoetako eta Barneko kontseilariari eta Ekonomia eta Ogasuneko kontseilariari ahalmena ematen zaie behar diren xedapen guztiak eman ditzaten Nafarroako Foru Komunitateko lehendakariaren foru dekretu honetan xedatutakoa garatu eta betetzeko, eta bidezkoak diren langileen eta baliabide ekonomiko eta materialen esleipena eta banaketa egin dezaten.
Azken Xedapenetako Bigarrena. Indarraldia.
Nafarroako Foru Komunitateko lehendakariaren foru dekretu honek Nafarroako Aldizkari Ofizialean argitaratzen den egunean hartuko du indarra.
