Sanz presidenteak itun sozialaren garrantzia nabarmendu du, lanpostu berriak sortu eta herritarren garapena bermatzen duelako ostirala, 2008.eko urtarrilak 11

Presidenteak babesa eman dio Nafarroako Enpresaburuen Konfederazioak eta UGT eta CCOO sindikatuek aurkeztu duten "Bases de un Acuerdo Social de Desarrollo Sostenible de Navarra" dokumentuari

Ezkerretik eskuinera, Molinero, Goyen, Ayesa eta Sanz Presidentea . ( irudia handitu )

Miguel Sanz Sesma Nafarroako Gobernuko presidenteak harrera egin die gaur, Nafarroako Jauregiko bulego ofizialean, José Manuel Ayesa Nafarroako Enpresaburuen Konfederazioko presidenteari, Juan Goyen UGT sindikatuko Nafarroako idazkari nagusiari eta José María Molinero CCOO sindikatuko Nafarroako idazkari nagusiari. Hiru erakundeek egin duten "Bases para el Acuerdo Social de Desarrollo Sostenible en Navarra" (Nafarroan Garapen Iraunkorreko Akordio Soziala erdiesteko Oinarriak) dokumentua aurkeztu diote presidenteari; hots, joan den abenduan jendaurrean aurkeztu zutena.

Bileraren ondoren, San presidenteak prentsaurrekoa eman du, Ayesa, Goyen eta Molinerorekin batera, eta nabarmendu duenez, lan harremanen esparruan azkeneko urteetan Nafarroan garatutako itun sozialaren garrantzia berresten omen du dokumentuak. Presidenteak adierazi duenez, horren froga dira "lortutako emaitza bikainak, enpleguaren gorakadan isla dutenak; izan ere, 1996az geroztik 91.000 lanpostu berri sortu dira, eta 1996an Foru Komunitatean 1980.000 lanpostu zeuden bitartean, gaur egun 289.000 lanpostu daude". Ildo horretan, eta Miguel Sanzek adierazi duenez, "ituna tresna egokia da nahitaezko garapena bermatzeko, eta herritarrei aukerak eta aurrerabidea ekartzeko".

Sanz presidenteak babesa eman dio dokumentuari eta Nafarroako Enpresaburuen Konfederazioak eta UGT eta CCOO sindikatuek hitzartutako neurriei sostengua emateko konpromisoa hartu du. Horregatik, dagoeneko ezarri dituzte dagokion estaldura ekonomikoa emateko oinarriak, eta berehalako eragina izanen dute Nafarroako Aurrekontu Orokorren lanketan. Hartara, garrantzi handiko atalak hartu dituzte kontuan, hala nola Hezkuntzan eta Prestakuntzan aurreikusitako gastua %14,4 handitzea, Gizarte Gaietan aurreikusitakoa %14,6 handitzea, Osasunean aurreikusitakoa %8,5 handitzea, Berrikuntzakoa %10 baino gehiago handitzea, eta Etxebizitzako partida %10 handitzea.

Miguel Sanzek adierazi duenez, itun sozialari esker ezbehar kopuruak eta behin-behinekotasunak ere behera egin dute, baina hala ere "horiexek dira eragile ekonomikoen eta sozialen erronka nagusiak". Era berean, itunari esker lan gatazkak auzitegietara jo behar izan gabe konpondu direla nabarmendu du presidenteak, eta aipatu duenez, akordioek ondorio onuragarriak izan dituzte oreka sozialeko eta aukera berdintasuneko politiketan. Gainera, politika horien onuradun nagusiak emakumezkoak izan dira.

José Manuel Ayesa Nafarroako Enpresaburuen Konfederazioko presidenteak nabarmendu duenez, berriz, 1993az geroztik etengabe akordioak erdiesteko tresnak garatzen ari dira eragile ekonomikoak eta sozialak, eta itun soziala eta sistemaren iraunkortasuna bermatuko badira, tresna horiek hedatzeko unea iritsi da. Ildo horretan, eta Ayesak adierazi duenez "Nafarroa eredua da, Espainiako gainerako lurraldeentzat, gisa horretako elkarrizketari dagokionez".

Amaitzeko, Juan Goyenek eta José María Molinerok oso balioespen positiboa egin dute Nafarroako Gobernuak Akordioari egin dion harreraren gainean, eta adierazi dutenez, joan den urtean itunari esker izandako emaitza onek bidea egokia dela islatzen dute

Dokumentazioa:: Prentsaurrekoa ikusi; Escuchar esta rueda de prensa

Jar zaitez gurekin harremanetan | Erabilerraztasuna | Lege abisua | Webaren mapa