Castellano | Euskara | Français | English
Ezagutzera eman
Ikusi egun honetako albiste gehiago
García Malo kontseilaria Malira abiatuko da bihar, Nafarroako Gobernuak 1,3 milioi eurorekin finantzatu dituen garapenerako lankidetzako sei proiektu bisitatzeko bidaian osteguna, 2008.eko urtarrilak 24
Afrikako herrialde horretako lankidetza osasuna, hezkuntza eta elikagaien segurtasuna lantzera eta edateko ura izatera bideratzen da
García Malo kontseilaria.
(
irudia handitu
)
Familia, Gazteria, Kirol eta Gizarte Gaietako kontseilari María Isabel García Malo Malira abiatuko da bihar, ostirala, Nafarroako Gobernuak herrialde hartan 1,3 milioi eurorekin finantzatu eta Nafarroako Foru Komunitatean egoitza duten Garapenerako Gobernuz kanpoko erakunde batzuek sustatutako garapenerako lankidetzako sei proiektu bisitatzeko bidaian.
Afrikako herrialde horretan emanen dituen bederatzi egunetan, García Malo Espainiako Gobernuko Kanpo Aferetako ministro Miguel Angel Moratinosekin bilduko da hiriburuan, Bamakon, eta harekin batera parte hartuko du Espainiako Enbaxadaren inaugurazioan eta Garapenerako Lankidetzarako Espainiaren eta Maliren arteko I. Batzorde Mistoaren izenpetze ekitaldian. Proiektuetara bisitan joanen da, eta, halaber, solasaldiak izanen ditu bertako agintariekin eta Malin lanean ari diren kooperante nafarrekin bilduko da. Zuzendari nagusiak bidaide izanen ditu Gizarte Gaien eta Garapenerako Lankidetzaren zuzendari nagusia, Marta Álvarez Alonso; Garapenerako Nazioarteko Lankidetzaren Zerbitzuko zuzendaria, Andrés Carbonero Martínez; kontseilariaren kabineteko burua, Raquel Pérez Ayerra; eta Juan Ignacio San Miguel Pascual, "Fundación Acción contra el Hambre" GGKEkoa, Nafarroako Garapenerako Lankidetzaren Kontseiluko kide dena.
Bidaiaren xedea da bertatik bertara ebaluatzea Nafarroako Gobernuak finantzatutako proiektuak, hiru alderdi kontuan izanik: proiektuen jarraipena eta ebaluazioa egitea, proiektuak gauzatzen ari diren kooperante nafarrek eta erakundeek egindako lanari sostengua ematea, eta Foru Komunitatean egoitza duten GGKEen bitartez esku hartzen ari den eskualdeen eta Nafarroaren arteko harremanak sendotzea.
Mali munduko herrialde txiroenetako bat da; errenta banaketa oso desorekatua eta kanpoko laguntzarekiko mendekotasun handia du. 1.240.000 km2-ko azalera du eta lurraldearen %65 basamortua edo ia basamortua da. Populazioaren %10 inguru (11,4 milioi pertsona, 2006an) nomada da, eta langileen %80 nekazaritzan eta ibaietako arrantzan aritzen dira. Jarduera ekonomikoa Niger ibaiak ureztatzen duen eskualdera mugatua dago eta nekazaritzako produktuen eraldaketaren arlokoa da gehienbat.
- Dokumentazioa:
- Berri osoa.doc
