Castellano | Euskara | Français | English
Ezagutzera eman
Ikusi egun honetako albiste gehiago
Nafarroako Gobernuak Hezkuntza eta Zientzia Ministerioarekin hitzarmena egiteko baimena eman du, Nafarroan Irudi Medikoaren arloko ikerketa zentroa egiteko astelehena, 2008.eko urtarrilak 28
Foru Komunitateko osasun zentroak Erradiologia, Medikuntza Nuklear eta Irudi Medikoaren arloetako ikerketan aitzindari direla aitortu dute hitzarmenean
Nafarroako Gobernuak baimena eman du, Osasun Departamentuaren eta Hezkuntza eta Zientzia Ministerioaren arteko lankidetza hitzarmena egiteko, eta hartara, Nafarroan Irudi Medikoaren arloko Instalazio Zientifiko eta Teknologiko Berezia (ICTS) eraiki, hornitu eta ustiatzea helburu duen partzuergoa sortzeko.
Zentroaren helburua gaixoei irudi mediko digitalak (eskanerrak, erresonantzia magnetikoak, erradioskopia, etab.) egiteko bitartekoak eta prozedurak ikertzea izanen da, gaixotasunak antzeman, diagnostikatu eta tratatzeko duten potentzialtasuna hobetze aldera.
Zentroa ikerketan bakarrik jardunen da, eta gisa horretako bakarra izanen da Espainian. Horixe bera izanen da azpiegituraren berezitasuna; izan ere, Irudi Medikoaren teknologia duten zentroek artapen eta irakaskuntza helburuekin erabiltzen dute batik bat, eta ikerkuntza erabilera, berriz, osagarria izan ohi da.
Zentzu horretan, Irudi Medikoaren arloko ICTS zentroak hiru zeregin izanen ditu. Batetik, erreferentzia zentroa izanen da, eta horretarako, berezko programa zientifikoa izanen du. Era berean, bitarteko teknologikoak eta azpiegiturak ere izanen ditu, Estatuko eta nazioarteko ikertzaile taldeek bertan lan egiteko. Zentroan eginen dituzten ikerketen emaitzak enpresei eskualdatu ahal izanen dizkiete.
Bestetik, Irudi medikoaren arloko ICTS zentroak lankidetzako programa zientifikoa eskainiko du, eta hori izenpetzen duten ikertzaile taldeek zentroko azpiegiturak eta ekipamenduak erabili ahal izanen dituzte.
Amaitzeko, erreferentzia zentroa izanen da prozeduren eta teknologien normalizazioari eta egiaztapenari dagokionez, eta Irudi Medikoaren arloko teknikarik berritzaileenak ebaluatuko dituzte bertan. Xede horretarako, teknika horien garapenean diharduten enpresek aldez aurretiko azterlanak egin ahal izanen dituzte zentroan, euren proiektuen eraginkortasuna eta berezitasuna frogatzeko.
Gisa horretako instalazio bereziak (ITCS) Gobernu Zentralaren eta autonomia erkidegoen lankidetzarekin egiten dira, eta Estatuan eta nazioartean kasuan kasuko arloko ikerketa teknologikorako erreferentzia zentro bilakatzea dute xede. Irudi medikoaren arloko ICTS zentroa Nafarroan eraikitzearen arrazoia bertako osasun zentroen ibilbide bikaina da; izan ere, diziplina horretako ikerketa jarduerak egiten dituzte, eta ondorioz, Foru Komunitatea Espainiako lehena da 1996-2004 aldian sortutako dokumentuen bolumenari eta biztanleko hitzorduei dagokionez.
Nafarroako Gobernuak eta Hezkuntza eta Zientzia Ministerioak izenpetu beharko duten lankidetza hitzarmenari erantsi zaion txostenean aitortu dutenez, Nafarroako Ospitaleak, Bideko Ama Birjina Ospitaleak, Ikerketa Mediko Aplikaturako Zentroak, eta Klinika Unibertsitarioak Estatuan nabarmentzen den ardatza osatzen dute, Erradiologia, Medikuntza Nuklear eta Irudi Medikoaren diziplinetako ikerketaren bikaintasuna dela-eta.
Instalazioaren kostua milioi bat eurokoa izanen da, eta Nafarroako Gobernuak eta Hezkuntza eta Zientzia Ministerioak erdibana ordainduko dute, 2008ko eta 2009ko aurrekontu ekitaldietan.
Nafarroako Gobernuaren eta Hezkuntza eta Zientzia Ministerioaren parte-hartzea izanen duen bitariko partzuergo batek zuzendu eta kudeatuko du Irudi Medikoaren arloko ICTS zentroa. Partzuergoa Osasunbidea-Nafarroako Osasun Zerbitzuaren instalazioetan kokatuko da, eta zuzenbide publikoko erakundea izanen da. Bertako organoak kontseilu errektorea, batzorde eragilea eta zuzendaria izanen dira. Kontseilu errektoreak eta batzorde eragileak bi administrazioen ordezkaritza izanen dute, modu paritarioan. Partzuergoa Nafarroaren eta Estatuaren aurrekontu transferentzia paritarioen eta sektore pribatuak eman ditzakeen diru laguntzen eta laguntzen bidez finantzatuko da.
