Castellano | Euskara | Français | English
Ezagutzera eman
Ikusi egun honetako albiste gehiago
Pirinioetako Autobideko azkeneko tarteak enkantean jartzeko bideragarritasun azterlana egiteko gastua onartu du Gobernuak astelehena, 2008.eko maiatzak 12
Gastua 380.000 eurokoa da, eta azterlanaren baitan egonen dira lanak esleitzeko kontratua prestatzeko lanak, aurkeztutako eskaintzen balioztapen tekniko-ekonomikoa, eta esleipendunaren finantzaketa planaren azterketa
Nafarroako Gobernuak akordioa erdietsi du, eta hartara, A-12 Pirinioetako Autobideko "Judasen Benta-Esa" eta "Esa-Nafarroako muga" tarteetako lanak esleitzeko lehiaketa egiteko zenbait azterlan egiteko aholkularitza teknikoa kontratatzeko baimena eman du. Azterlanen baitan egonen dira: herri lanak esleitzeko kontratua enkantean jartzeko prestaketa lanak (bideragarritasun azterlana eta kontratuko klausulen agiria egiteko lankidetza), aurkeztutako eskaintzen balioztapen tekniko-ekonomikoa (eskaintza horiek abian jartzearekin batera egingo da) eta esleipendunaren finantzaketa planaren azterketa (onartzeko eta kontratuan sartzeko).
Aurreikusi duten aurrekontua 380.000 eurokoa da, eta lanak egiteko epea 16 hilabetekoa izanen da. Bi urtean sariak emanen dituzte, 190.000 eurokoa bakoitza; hain zuzen, 2008an eta 2009an. Pirinioetako Autobideko bi tarteak eraikitzeko finantzaketa sistema gisa "itzalpeko ordainsaria" hautatu zuten, 2008ko apirilaren 21eko Akordioan.
"Itzalpeko ordainsaria" izeneko ordainketa sistemari jarraiki, Nafarroako Gobernuak kanon bat ordainduko dio autobidearen kontzesioa duen enpresari (autobidea eraikitzea eta mantentzea dagokion enpresari), urte kopuru jakin batean bertan ibiltzen den ibilgailu bakoitzeko.
Nafarroa 2012 Planaren helburuetako bat Pirinioetako Autobidea eraikitzeko finantzaketa eskaintzea da (Nafarroako tarteari dagokionez), eta horretarako beharrezkoa da Judasen Bentaren eta Aragoiko mugaren arteko tarteak eraikitzea. A-21 autobideko lanak 7 tartetan banatuta daude Nafarroan. Tarteak honako hauek dira, hain zuzen: dagoeneko irekita dauden biak (Noaingo Lotunea eta Noain-Elo); eraikitzen ari diren hirurak (Elo-Idotzin, Idotzin-Izko, eta Izko-Judasen Benta); eta azkeneko biak (Judasen Benta-Esa eta Esa-Nafarroako muga). Esan dugunez, azkeneko biak itzalpeko ordainsariaren bidez jarriko dituzte enkantean. Ingurumenaren gaineko Eraginaren Deklarazioa egin dute dagoeneko.
