Catalán kontseilariak Komunikazioaren Arloko Profesionalentzako II. Jardunaldia inauguratu du, adierazpen askatasuna eta intimitate eskubidea ardatz izanen dituen jardunaldia asteazkena, 2008.eko urriak 8

Alberto Catalán Higueras Nafarroako Gobernuko Erakundeekiko Harremanetarako eta Gobernuaren Eledunaren Departamentuko kontseilariak Komunikazioaren Arloko Profesionalentzako II. Jardunaldia inauguratu du gaur goizean. Bertan adierazpen askatasuna eta intimitate eskubidea aztertuko dituzte, hain zuzen.

Catalán kontseilaria eta Fátima Ruiz. ( irudia handitu )

Jardunaldia Iruñeko Prentsa Elkarteak antolatu du, eta babeslea Nafarroako Gobernua da. Gaur eginen dute, Iruñeko Planetarioan, eta komunikazioaren arloko profesionalek eta unibertsitateko ikasleek parte hartuko dute. Programari dagokionez, hiru txosten aurkeztuko dituzte, eta hala, gaia ikuspuntu teoriko-deontologikotik, juridikotik eta praktikotik aztertuko dute (azkenekoaren kasuan, lanean ari diren kazetarien ikuspuntua aztertuko dute).

Inaugurazio ekitaldian, Iruñeko Planetarioan, Fátima Ruiz Iruñeko Prentsa Elkarteko presidenteak ere parte hartu du, eta Catalán kontseilariak adierazi duenez, I. Jardunaldiak izan zuen emaitza ona kontuan hartuta Nafarroako Gobernuak eta Iruñeko Prentsa Elkarteak beharrezkotzat jotzen dute eztabaida eta gogoeta gune sendo bat sortzea, kazetariek lanbideko zereginekin zerikusia duten gaiei buruz duten trebakuntza areagotzeko.

Zehazki, honako hau nabarmendu du Alberto Catalánek: "Kazetarien baldintzak hobetzea onuragarria da hedabideetarako. Gainera, hedabideek funtsezko egitekoa dute iritzi publikoaren eraketan, eta garrantzizko zeregin soziala dute. Hain zuzen ere, aurten 30 urte beteko ditu Espainiako Konstituzioak, gure esparru juridiko-politikoak, eta Konstituzioak eskaini dituen funtsezko askatasun eta eskubideei esker hedabideek euren informazio lana gauzatu ahal izan dute, demokrazia eta zuzenbidea oinarri hartuta. Konstituzioak aitortzen dituen eskubideetako bat adierazpen askatasuna da".

"Baina eskubide guztiek mugak dituzte, eta hala, Lege Nagusiko 20.4. artikuluan xedatuta dagoenez, adierazpen askatasunaren mugak ohorerako, intimitaterako, nork bere irudia izateko, eta gazteak eta haurrak babesteko eskubideak dira", gaineratu du Catalánek.

Catalán kontseilariak adierazi duenez, adierazpen askatasuna eta intimitate eskubidea "gaur-gaurko gaiak dira, eta komunikazioaren arloko profesionalen, unibertsitateen eta legelarien interesa ez ezik, gizartearena ere pizten dute. Gainera, gizarteak ez ditu ulertzen hedabideek dituzten zenbait jarrera eta pertsonen intimitate eskubidea gorabehera, informazioa lortzeko grina neurrigabea".

Amaitzeko, Alberto Catalánek zenbait galdera egin ditu, gogoetarako: Zer da proiekzio publikoko pertsona edo gertakaria izatea (informazio bihurtu daitekeen pertsona edo gertakaria), eta zer ez? Bidezkoa al da kargu publikoren bat duten pertsonen bizitza pribatuari buruzko informazioa ematea? Noiz? Kargu publikoren bat izateak intimitate eskubidea kentzen al du? Non daude pertsonen bizitza pribatuaren gaineko informazio interesaren mugak? Nork arautu beharko luke informazio interesa? Arautu beharko ote litzakete?

Dokumentazioa:: Programa de la jornada; Contenido de la jornada

Jar zaitez gurekin harremanetan | Erabilerraztasuna | Lege abisua | Webaren mapa