Castellano | Euskara | Français | English
Ezagutzera eman
Ikusi egun honetako albiste gehiago
"CIBARQ 08" biltzarrean, ingurumen irizpideen araberako hiri berrikuntza aztertuko dute asteazkena, 2008.eko urriak 15
Arkitektura, Hirigintza eta Energiaren III. Nazioarteko Biltzarra Iruñean eginen dute, urriaren 30ean eta 31n, eta haren baitan, Espainiako Arkitekturaren IX. Biurtekoko lanen erakusketa eginen dute
CIBARQ 08.
(
irudia handitu
)
Arkitektura, Hirigintza eta Energiaren III. Nazioarteko Biltzarra (CIBARQ 08) Iruñean eginen dute, urriaren 30ean eta 31n, eta bertan ingurumen irizpideen araberako hiri berrikuntza aztertuko dute. Biltzarra Energia Berriztagarrien Zentro Nazionalak (CENER) antolatu du, Arkitektura Bioklimatikoko Departamentuaren bidez eta Europako Batzordearen, Espainiako Arkitektoen Elkargoetako Kontseilu Nagusiaren (CSCAE) eta Nafarroako Gobernuaren sostenguarekin.
Biltzarra José María Roig Aldasoro Berrikuntza, Enpresa eta Enplegu Departamentuko kontseilariak, José Carlos Esparza Sáez Etxebizitza eta Lurralde Antolamenduko Departamentuko kontseilariak eta Florencio Manteca CENER zentroko Arkitektura Bioklimatikoko Departamentuko presidenteak aurkeztu dute, gaur eguerdian, prentsaurrekoan.
CIBARQ 2008 biltzarreko komisarioa Iñaki Ábalos arkitektoa izanen da, eta bertan, hirietan eraikuntzaren ondorioz sortzen diren energia eta ingurumen arazoetarako konponbideak bilatzen saiatuko dira, barrutik, hiriak aldatu eta euren energia eraginkortasuna areagotzeko, aldaketaren eragile gisa. Biltzarrean iraunkortasun irizpideen arabera zaharberritu dituzten auzoen adibideak jarriko dituzte, energia eraginkortasunean oinarritutako diseinua duten arkitektura moduengatik ordezkatu dituzten ehundura zaharkituen adibideak jarriko dituzte, eta energia berriztagarriak eskala handian integratzeko proiektuak aurkeztuko dituzte.
CIBARQ biltzarrean ohikoa denez, arlo horietako arkitekto, ingeniari, eta hirigile gailenak gonbidatu dituzte, eta besteak beste, Bernard Platnner (Renzo Piano Building Workshop-eko bazkidea), Mick Pearce (Zimbabwe), Jean Philippe Vassal (Frantzia), Alexandros Tombazis (Grezia) Francesca Sartogo (Italia), Felipe Pich-Aguilera (Espainia) eta Juan Rubio del Val (Espainia) bilduko dira bertara.
Biltzarrarekin batera, CIBARQeko Esperientzia eta Proiektuen II. Erakusketa eginen dute, eta xede horretarako antolatutako lehiaketan parte hartu duten proiektu nagusiak bilduko dituzte bertan.
Bestalde, biltzarraren esparruan, urriaren 30ean, Espainiako Arkitekturaren IX. Biurtekorako (2005-2006) hautatutako lanak biltzen dituen erakusketa aurkeztuko dute Baluarten. Erakusketan 2005eko eta 2006ko espainiar arkitekturako proiektu adierazgarrienak egonen dira ikusgai, 32 proiektu guztira. Honako hauek, besteak beste: Carme Pinós-en "Cube dorrea", Arkitektura Saria irabazi zuena; Jaime Coll eta Judith Leclerc-en "Londres-Villaroel ekipamenduak", Etxebizitza Kolektiboen Saria irabazi zuena; edo Victoria Acebo eta Ángel Alonsoren "Coruñako Artearen Etxea", Arkitekto Gazteen Saria irabazi zuena.
Erakusketa Etxebizitza Ministerioak antolatu du, Espainiako Arkitektoen Elkargoetako Kontseilu Nagusiarekin (CSCAE) elkarlanean, eta Iruñera Euskal Herriko Arkitektoen Elkargo Ofizialaren (EHAEO) eta CENER zentroaren babespean iritsiko da.
