Bideko Amaren Ospitaleak Espainiako Huntington Korea Elkartearen urteroko bilera antolatu du ostirala, 2008.eko urriak 24

Bihar Baluarten eginen den "Huntington gaixotasuna: ibilitako bidea, ibili beharrekoa" jardunaldian, gaixotasunaren sintomei aurre hartzeko eta haiek arintzeko azken aurrerakuntza eta tratamenduak ezagutaraziko dira

Bideko Amaren ospitaleak antolatu du Espainiako Huntington Korea Elkarteak bihar, larunbatean (urriaren 25), Iruñeko Baluarte Auditorioan eginen duen urteroko bilera. Jardunaldiaren izenburua "Huntington gaixotasuna: ibilitako bidea, ibili beharrekoa" da, eta María Kutz Peironcely, Osasun kontseilaria izanen du buru. Bileraren helburua "gaixotasun arrarotzat" jotzen den endekapenezko gaixotasun honen aurkako borrokan ahaleginak batzea da (Espainian 4.000 pertsona inguruk dute gaixotasun hau eta Nafarroan, 55 pertsonak), eta horretarako sintomei aurre hartzeko eta haiek arintzeko azken aurrerakuntza eta tratamenduak ezagutaraztea.

Halaxe azaldu dute gaur, Bideko Amaren Ospitalean egindako prentsaurrekoan. Bertan hitz egin dute Fernando Boneta doktoreak, ospitaleko zuzendariak, eta Elias Maraví doktoreak, Neurologia Zerbitzuko buruak; María Antonia Ramos doktoreak, VCO Genetika Medikoko Zerbitzuko buruak, eta Diana Rosasek, Harvard Unibertsitatearen (Boston) mende dagoen Massachussets General Hospital-eko Neurologia Departamentuko kideak. Bihar izanen den urteroko bilerari buruz hitz egiteaz gainera, Huntington Gaixotasunaren ezaugarriak zehaztu dituzte.

Larunbateko bilera María Antonia Ramos doktoreak aurkeztuko du eta honako txosten hauek izanen dira: 10:00etan, "Huntington gaixotasunean biomarkatzaileak eta estrategia terapeutikoak bilatzea", Diana Rosas doktorearen eskutik; 11:30ean, "Gaixotasuna ezarri aurreko diagnostikoa: Huntington gaixotasunerako irtenbide erreproduzitzaileak", Madrilgo Geniality Diagnóstico Genético zentroko Esther Fernández doktorearen eskutik; azkenik, 12:30ean, Asun Martínez Descalsek, Nazioarteko Huntington Erakundeko lehendakariak, pertsona orori zuzendutako hitzaldia emanen du: "Zer egiten ari gara Huntington gaixotasunaren aferan?).

Huntington Gaixotasuna

Huntington Gaixotasuna (HG) edo Huntington Korea herentziazko nahasketa da eta modu autosomiko menderatzailean kutsatzen da (hau da, gaixotasuna duen pertsona orok %50eko aukera du bere ondorengoak kutsatzeko). Nerbio sistema zentralean eragina du eta sintomak berrogei urte aldera hasten dira nabaritzen; sintomak agertu, eta gero eta larriagoak bihurturen dira hamabost edo hogei urtez, hil arte. Sintomak nahigabeko mugimenduak izan ohi dira (modu generikoan korea izena hartzen dutenak), eta maila kognitibo eta emozionaleko asaldurekin, asaldura psikiatrikoekin, pisu galerarekin eta dementziarekin loturik ageri dira.

Gaixoen asaldura psikiatrikoak eta izaerazkoak mugimendu arazoak edo koreak baino lehenago azal daitezke, eta familian, lanean eta gizartean arazoak dakartzate; askotan, arazo horiek gaixotasuna bera baino larriagoak izaten dira.

Teknikoki, IT15 izeneko genean hiru nukleotidoko (CAG) sekuentziaren kopia gehiegi izateak dakar gaixotasuna eragiten duen genearen aldaketa. Pertsona baten DNAren lagin batean, sekuentzia hori zuzenean aztertzeak gaixotasuna diagnostikatzen du, akatsik gabe, eta horrela, errazagoa da arriskua duten familiakoen artean gaixotasun eramaileak aztertzea. Aurresateko testa edo sintoma aurretiko testa izeneko azterketari esker, pertsonek bizitza eta familia planifikatzeko aukera izaten dute, baita beharrezkoak iruditzen zaizkien erabakiak hartzekoa ere, bizi duten egoeraren arabera.

Dokumentazioa:: Berri osoa.doc

Jar zaitez gurekin harremanetan | Erabilerraztasuna | Lege abisua | Webaren mapa