Bideko Ama Birjina Ospitaleak Lupuaren V. Jardunaldia antolatu du, gaixoei gaitzari buruzko informazioa emateko osteguna, 2008.eko abenduak 18

Osasun profesionalek hitzaldiak emanen dituzte, abenduaren 20an, 10:30etik 14:00etara, ospitaleko ekitaldi aretoan

Fernando Boneta Beorlegui Bideko Ama Birjina Ospitaleko zuzendariak eta Carlos Pérez García ospitaleko Barne Medikuntzako Zerbitzuko buruak Eritema Lupu Sistemikoaren (LES) V. Jardunaldia aurkeztu dute gaur goizean. Jardunaldia larunbatean eginen dute, abenduaren 20an, Bideko Ama Birjina Ospitaleko ekitaldi aretoan. Gaurko informazio ekitaldian María Ruiz Bideko Ama Birjina Ospitaleko Barne Medikuntzako espezialistak eta Matilde Martínez Nafarroako Osasun Zerbitzuko psikiatrak ere parte hartu dute; biak, lupua duten gaixoak artatzeko diziplina anitzeko sendagile taldeko kide dira.

Jardunaldiak lupua eta haren ondorioak sakon azaltzea, gaitzari buruzko zalantzak argitzea, gaixoei arazoa onartzen eta egunerokotasunean integratzen laguntzea, eta Lupua duten Gaixoen Nafarroako Elkartea (ADELUNA) aurkeztea ditu xede, eta horretarako, osasun profesionalek hitzaldiak emanen dituzte gaixoentzat. Gainera, gaitza duten emakumeei honako hau azalduko diete: haurdunaldia diziplinarteko mediku talde batekin antolatzeak garrantzi handia duela, eurentzako eta haurrarentzako arriskuak txikitzeko.

Jardunaldiko egitaraua honako hau da: 10:30ean, jardunaldia aurkeztuko dute; 10:45ean, Carlos Pérez Garcíak "Lupus y síndrome antifosfolípido: dudas más frecuentes en los pacientes" (Lupua eta sindrome antifosfolipidoa: gaixoek izan ohi dituzten zalantzak) hitzaldia emanen du; 12:15ean, María Ruiz Castellano Bideko Ama Birjina Ospitaleko Barne Medikuntzako espezialistak "Lupus y embarazo: trastornos médicos" (Lupua eta haurdunaldia: osasun arazoak) hitzaldia emanen du; eta amaitzeko, Matilde Martínez Moneo psikiatrak "Manejo del lupus por parte de los pacientes" (Gaixoek lupua nola maneiatu) hitzaldia emanen du.

Eritema Lupu Sistemikoa (LES)

Eritema Lupu Sistemikoa (LES) gaixotasun autoimmunea da, eta ondorioz, gorputzeko sistema immunitarioak ez du behar bezala erantzuten. Kasu batzuetan lupua azalean eta giltzaduretan baino ez da egoten, baina beste batzuetan gorputzeko organo gehienetan izan dezake eragina, hala nola giltzurrunetan, nerbio sisteman, odolean, biriketan, eta bihotzean.

Oro har, sistema immunitarioak gorputza infekzioetatik babesten du, baina gaixotasun autoimmuneren bat duten pertsonen kasuan, sistema immunitarioa ez da gai izaten infekzioen eta beste agente kaltegarri batzuen egitura molekularra eta gorputzeko zelulak bereizteko. Hala, erantzun immune hiperaktiboak jazotzen dira eta gorputzeko ehunek eta zelulek kalteak jasaten dituzte, batik bat odoleko zelulen (linfozitoak) eragina eta proteina batzuen (auto antigorputzak) eraketa direla-eta. Ondorioz, lupua duten gaixoen gorputzeko zelulek eta organoek hantura kronikoa jasaten dute.

Lupuaren sintomak honako hauek dira: nekea, sukarra, apetitu falta, goragalea, pisu galera, giltzaduretako mina, muskuluetako mina, eritema (tximeleta hegoen formako gorriuneak edo orbanak masailean), fotosentikortasuna (neurriz gaineko erreakzioa eguzki argiaren aurrean), anemia (odoleko hematieen edo globulu gorrien galera), leukopenia (globulu zurien galera), dardara (muskuluak nahi gabe eta zakarki uzkurtzea, burmuineko alterazioen ondorioz), bihotzeko eta biriketako alterazioak, giltzurruneko gutxiegitasuna, urdaileko eta hesteetako alterazioak, eta begietako alterazioak.

Gainera, lupua duten gaixoetako batzuk antifosfolipido izeneko antigorputzak sortzen dituzte, eta antigorputz horiek kalteak eragiten dituzte odol hodietan. Ondorioz, ehunetako arterietan eta zainetan tronbosiak gertatzeko arriskua areagotu egiten da, eta baita abortatzeko arriskua ere.

Mundu osoan arraza guztietako 5 milioi pertsonak baino gehiagok dute lupua. Batik bat emakumeengan du eragina (10 gaixotik 9 emakumeak dira), eta adin guztietan agertu daiteke. Nolanahi ere, ohikoagoa da haurrengan, nerabeengan eta 20-40 urteko pertsonengan (ugalkortasun etapan).

Nazioarteko azterlanen arabera, oro har 100.000 lagunetik 15-122k dute lupua, eta beraz, "gaixotasun arraro" gisa dago sailkatuta. Nafarroako datu zehatzik ez dago, baina aipaturiko proportzioari jarraiki, Foru Komunitatean 100-750 gaixo egon litezkeela esan dezakegu. Gainera, azterlanen arabera, urtero 7 bat kasu berri agertzen dira 100.000 laguneko (Nafarroan, hortaz, 42 bat kasu berri urtean). Bideko Ama Birjina Ospitaleko Barne Medikuntzako Zerbitzuak lupua edo sindrome antifosfolipidoa duten 80 bat pertsona artatzen ditu.

Dokumentazioa:: Berri osoa.doc

Jar zaitez gurekin harremanetan | Erabilerraztasuna | Lege abisua | Webaren mapa