Euskararen Nafar Institutuak joan den asteburuan Explingua Hizkuntzen Azokaren hogeitahirugarren edizioan parte hartu du. Azoka azaroaren 19tik 21era egin da Berlinen.

Urtero Europar Batasunean hizkuntzei eta kulturari buruz egiten den nazioarteko azoka nagusia da. Erakusketak arrakasta handia izan ohi du, parte-hartzaile ugari izaten baititu: edizio honetan, 26 herrialdetako 182 erakusketari, 50 hizkuntza inguru, eta 13.000 bisitari baino gehiago bildu dira.

Euskararen Nafar Institutuak, euskara kanpoan sustatzeko duen eginkizunaren barruan, erakusketan mahai bat izan du, eta bertan euskarari eta Nafarroako Gobernuaren menpeko erakunde horretatik bultzatzen diren programei eta zerbitzuei buruzko informazioa banatu du.

Era berean, hizkuntza horretan argitaratutako azken lanak jakinarazi dira eta Foru Komunitateko turismo-eskaintzari buruzko informazioa eman da. 300 DVD, katalogo eta turismo gida baino gehiago banatu dira Nafarroako mahaia bisitatu dutenen artean.

Expolingua planetako kultura desberdinei eta atzerriko hizkuntzen irakaskuntzari eta ikaskuntzari lotutako produktuak eta zerbitzuak aurkezteko plataforma da. Horrez gain, hizkuntza prestakuntzan eta politikan aritzen diren erakundeen artean esperientziak trukatzea errazten du.