Nafarroako Gobernuak, Nafarroako Gazteriaren Institutuaren (NGI) bidez, Nafarroako Gazteriaren Sarietan aipamen berezia Garuneko Gaitzaren Nafarroako Elkarteari (Adacen) eman dio. Irabazteko asmorik ez duen elkarte hori garuneko gaitza dutenek eta horien familiakoek sortu zuten, kolektibo horren arazoen eta beharrizanen inguruan gizartea eta erakundeak kontzientziatzeko.

NGIk aipamen berezia Foru Komunitateko gazteriaren arloan eragin nabarmena izan duten pertsonei eta entitateei ematen die. Ildo horretatik, NGIk modu berezian baloratu ditu Adacenek egindako ekintzak gazteen artean autobabesa, segurtasuna eta istripuen prebentzioa sustatzeko. Modu horretan, 2010. urtean eta gidabaimena lortzeko laguntzen barruan, entitate horrek modu eraginkorrean gidatzeko eta bide segurtasuneko ikastaroak egin ditu, gazteak gidatze seguru eta arduratsua egitearen inguruan sentsibilizatzeko. Mementoz 18 eta 25 urte bitarteko 550 gaztek baino gehiagok lortu dute prestakuntza hori.

2005etik, Adacenek bide prebentzioko programa garatzen du gazteentzat Nafarroako Gobernuko Barne Zuzendaritza Nagusiarekin lankidetzan. Horren barruan, Nafarroa osoko ikastetxeetan hitzaldiak ematen ditu, adin horretan oinezko eta gidari moduan ohitura zuzenak garatzeko. Horretarako, trafiko-istripuen ondorioz garuneko gaitzak dituzten pertsonen laguntza izan dute, eta azken horiek ikasleei haien esperientziak eta bizimoduan izandako aldaketak kontatu dizkiete. Hain zuzen ere, Barne Zuzendaritza Nagusiak proposatu zuen aipamena Adaceni ematea.

Amaitzeko, gogoan izan behar da Nafarroako 2010eko Gazteriaren Sariak, Erakunde edo Entitatearen, Parte-hartze sozialaren eta Gaztearen kategorietan, joan den azaroaren 18an erabaki zirela. Hauek izan ziren saridunak: San Adriango Udala, Nafarroako Unibertsitateko Gizarte Laguntzarako Unibertsitariak, Álvaro Iborra eta Ander Lamaisón, hurrenez hurren.

Sariak emateko ekitaldi ofiziala datorren astean izango da Nafarroako Jauregian, Nafarroaren Eguna ospatzeko ekitaldien barruan.