Foruzaingoko 20. promozioko 109 agenteak gaur goizean jabetu dira beren lanpostuez (orain, guztira 1.100 foruzain daude), eta lehen lehendakariordea eta Lehendakaritza, Justizia eta Barne kontseilaria, Javier Caballero, izan da ekitaldiko burua.

Caballerok foruzain berriei esan die nafarrek, "bizi ditugun zailtasun ekonomikoen aurrean lan eraginkorra egitea" eskatzen dietela. Horren harian adierazi du nafar gizartea "modernoa eta dinamikoa" dela, "kalitatezko zerbitzuak" eskatzen dituela, eta espero duela funtzionario publikoek "herritarren zerbitzura lan egitea, ez interes pertsonalei jarraiki".

Lehendakariordeak azpimarratu du, baita ere, Foruzaingoa "elkarlan estuan" ari dela estatuko segurtasun indarrekin, Segurtasun Batzordeak 2009ko ekainean Iruñean sinatutako hitzarmen bati jarraiki. Izan ere, foruzainak, polizia nazionala eta guardia zibila arlo espezializatuetan ez ezik (ingurumenean eta zirkulazioan, adibidez), jarduera orokorragoetan ere ari dira lankidetzan.

Gaur kargua hartu duten 109 foruzainetatik zortzi emakumezkoak dira, eta 89 Nafarroan jaiotakoak.

Plakak eta ziurtagiriak gaur goizean jaso dituzte, Nafarroako Administrazio Publikoaren Institutuko (NAPI) egoitza den Kultura eta Turismo Departamentuko patio isabeldarrean. Ekitaldira bertaratu dira, besteak beste, Nafarroako Parlamentuko presidentea, Elena Torres; Barne zuzendari nagusia, Juan Ramon Rabade; Foruzaingoko burua, Alfonso Fernandez Diez; estatuko segurtasun indarretako agintari eta ordezkari batzuk; eta Gobernuak Nafarroan duen ordezkaria, Elma Saiz Delgado.

Kontseilariak, hasteko, taldea ikuskatu du, Parlamentuko presidentearekin eta Foruzaingoko arduradun Alfonso Diezekin batera.

Fernandez Diezek hitz batzuk egin ondoren hartu dituzte karguak agenteek.

Segidan Caballerok hartu du hitza eta foruzain berriei gogorarazi die lan garrantzitsua egingo dutela, "prestakuntza aldi zorrotz eta gogorra" gainditu ondoren.

Kontseilariak nabarmendu du Foruzaingoa asko garatu dela eta orain "polizia integrala" dela: "Foruzaingoa gai da edozein segurtasun premiari erantzuteko; hurbila da, herritarrekin harremanetan aritzeko daukan moduagatik eta lurralde hainbat eremutan zabalduta dagoelako; eta, gainera, modernoa, kasu konplexuak ikertzeko bitartekoak baitauzka: Maria Puy Perezen hilotza aurkitu zuten, Cordovillako krimena ebatzi zuten eta droga trafikatzaileen nazioarteko sarea desartikulatu zuten".

Horrez gain, azpimarratu du Foruzaingoak "funtsezko prebentzio lana" egiten duela eta agente berriei animoak eman dizkie laneko zailtasunei aurre egiteko.