Miguel Sanz Sesma Nafarroako Lehendakariak Tafallako Nuestra Señora de la Caridad Ospitale Egoitzaren eraikin berria inauguratu du gaur goizean. Egoitza egiteko Familia, Gazteria, Kirol eta Gizarte Gaietako Departamentuak 4.604.800 euroko diru-laguntza eman du, hau da, 5.756.000 euroko aurrekontuaren %80. Horrez gain, Parlamentuko zuzenketa baten bidez, Nafarroako Gobernuak adinekoen egoitza honen ekipamenduaren kostuaren zati bat ere finantzatuko du.

Ekitaldira María Isabel García Malo Familia, Gazteria, Kirol eta Gizarte Gaietako kontseilaria ere joan da, baita Cristina Sota Tafallako alkatea eta Silvia Murga egoitzako zuzendaria ere. Inaugurazioaren ostean, bertaratutako guztiek instalazioak bisitatu dituzte.

Eraikina

Eraikin berria Tafallako Avenida de Tudelan, 26. zenbakian, egin dute. Behe solairua eta beste bi solairu ditu, erdi-soto txiki batekin eta ibiltzeko moduko estalki batekin.

Behe solairuak 910 m2 erabilgarri ditu, eta bi inguru berezitu ditu. Lehenengo ingurua erabiltzaileei irekita dago, eta ataria, egongela, jangela, zuzendaritzaren bulegoa, ekitaldien aretoa eta kapera ditu. Bigarren inguruak erabilera murriztua du eta bertan sukaldea, ikuztegia, langileentzako aldagelak eta langileentzako sarbidea daude.

Lehenengo solairuak 1.126,49 m2 ditu eta bigarrenak 1.130,59 m2. Solairu bakoitzak banakako 24 logela, 6 logela bikoitz, komun geriatrikoa, egongela eta terraza ditu. Gainera, lehenengo solairuan botikina, fisioterapia gela eta ile-apaindegia daude, eta bigarren solairuan, jangela dago. Era berean, erdi-sotoan, 183,92 m2-ko azaleran, zentroaren instalazioetarako gelak daude, hala nola, galdara, telekomunikazio eta klimatizazio gelak.