Pazienteen Eskolak maiatz eta ekainerako gaixotasun kronikoei, baskularrei eta Alzeheimer-ari buruzko 10 tailer antolatu ditu. Pazienteentzat eta haien senideentzat dira, beren osasun eta ongizatea hobetzeko asmoz.

Tailer bakoitzak 10-15 parte-hartzaile ditu, eta arratsaldez izango dira hainbat udalerritan egingo diren saioetan. Zehazki, "Alzheimer-a edo beste dementzia batzuk dituzten pazienteen zaintzaileentzako tailerra" Iruña, Tutera eta Lizarran egingo da; "Gaixotasun kronikoei aurre egiteko tailerra", Iruña, Tafalla eta Erronkarin; "Elikadura osasungarriaren tailerra gaitz kronikoetan", Altsasun eta Larraintzarren; eta "Gaixotasun baskular batekin bizitzea" izeneko tailerra (infartua, bularraldeko angina, diabetesa, iktus arinak…), Zangozan eta Elizondon.

Data-egutegia, iraupena eta tailer bakoitza non egingo den, bai eta haiei buruzko informazio guztia eta izena emateko formularioa ere, ondorengo webgunean aurkitu daiteke: www.escueladepacientes.navarra.es. Telefonoz ere eska daiteke 848 42 19 54 telefono-zenbakira dei eginez, 08:00etatik 15:00etara, edo mezu elektroniko bat bidaliz honako helbide honetara: escueladepacientes@navarra.es.

Saioak Pazienteen Eskolarekin lankidetzan ari den irakasle-talde batek emango ditu, osasuneko 9 profesionalek osatuta (7 erizaintzakoak, eta 2 gizarte-lanekoak), bai eta adituak diren 9 pazientek ere, haiek guztiak horretarako bereziki prestatuta daudenak. Lan-metodologiaren barnean sartzen dira: hitzaldiak, eztabaidak, kasuen azterketak, ariketak, esperientziak partekatzea…, talde txikietan nahiz gela osoarekin.

Tailerrak Nafarroako Pazienteen Eskolako jardueretako bat dira,  iragan martxoan abian jarritakoa, eta haren helburu nagusia gaixotasun kronikoak dituzten, eta haien senide zein zaintzaileen osasuna nahiz ongizatea hobetzea da. Gaitz kroniko bat diagnostikatzen denean sortzen diren beharrak jorratu nahi dira eta, horretarako, zenbait alderdi hartzen ditu, adibidez: patologiari buruzko informazioa, autozaintzarako eta farmaziako tratamendurako trebetasunak garatzea, bai eta diagnostikoaren aurrean sortutako emozioak erabiltzen jakitea ere.

Hala, prestakuntzako ekintza batzuk eskaintzen ditu: orain jarriko diren antzeko tailerrak, ikastaroak, edo mintegiak, aurrez aurrekoak nahiz on-line bidezkoak, eta 1988. urtetik osasun-zentro publikoetan (osasun-zentroetan, bereziki) egiten diren ekintzak osatzen dituzte. Pazienteen eskola Nafarroako Osasun Publikoaren eta Lan Osasunaren Institutuko Osasuna Sustatzeko Atalak koordinatzen du, eta pazienteen nahiz lehen-mailako arretako elkarteen lankidetza du.