Aurreikusita dagoenez, bigarren neurri horrek gaur egun Lanbide Arteko Gutxieneko Soldata baino pentsio txikiagoak jasotzen dituzten eta, beraz, alarguntasun-pentsioak jasotzen dituzten pertsonekin alderatuta desabantaila egoeran dauden 12.466 onuradun izango ditu. Aurreikusten denez, 2019an erabat garatuta dagoenean, neurri hori abian jartzeko egin beharreko inbertsio soziala urte bakoitzeko 9,6 milioi eurokoa izango da. Eskubide Sozialetako Departamentuak –Gizarte Segurantzarekin datuak kontrastatuta– egindako kalkuluen arabera, 2016ko abenduan, hileko 408,10 euroko ZBNS (zahartzaro eta baliaezintasuneko nahitaezko sorospena) pentsioak zituzten 53 pertsona zeuden Nafarroan; 65 urtez azpiko pertsona bakarreko titularren 1.818 pentsio, hileko 586,50 eurokoak; hileko 627,7 euroko 8.871 pentsio; eta 1.724 lagun, hileko 677 euroko batez besteko pentsioarekin. Lehendabiziko hiru taldeei % 63,7, % 12 eta % 4,8, hurrenez hurren, igoko zaie jaso beharreko zenbatekoa 2017an; eta laugarrena, berriz, % 3,41 igoko da 2018an. 2018an jasoko dituzte zenbateko osagarriak, 2017ko errenta-aitorpena egiten dutenean; eta 2019an, berriz, 2018an igoko diren pentsioen kasuan.

Pentsio guztiak parekatzeko prozesua amaitzen denean, urtero 16,6 milioi euroko inbertsio soziala egin beharko dela zenbatesten da alarguntasun-pentsio guztiak eta Lanbide Arteko Gutxieneko Soldataz azpiko kotizaziopeko pentsioak osatzeko; horrek esan nahi du bost aldiz handituko dela inbertsioa, gaur egunekoarekin alderatuta.

Erosahalmen-mailari eustea

Nafarroako Gobernuaren proposamenak jasotzen du hurrengo urteetan pentsio horiek guztiak –gehi Nafarroak ematen duen osagarria– birbaloratzea, Nafarroako KPI handitzen den neurri berean, pentsionisten ez dezaten erosahalmen-maila galdu.

Eskubide Sozialetako lehendakariordeak neurri horien balorazio oso positiboa egin du; izan ere, "programa-akordioan ezarritako helburu bikoitza lortzea dakar; hau da, alarguntasun-pentsioak hobetzea eta abantaila egoeran zeuden pentsionistak parekatzea".

"Badakigu pentsio-sistema eta gizarte-segurantza gobernu zentralaren ardura direla, eta hobe izango litzatekeela gobernu zentralak hartzea bere gain jende guztiak gutxieneko pentsio duin bat izateak dakarren kostua, baina, nolanahi ere, Nafarroako Gobernuak uste du, kontuan hartuta Nafarroan dugun bizitza-kostuaren aldea eta Gobernu honek lehentasuna ematen diola alderdi sozialari, beharrezkoa dela guk geuk egitea ahalegin bat egoera ekonomiko eskasagoan dauden adineko pertsonen bizi-baldintzak hobetzeko", azpimarratu du Laparrak.

Laguntzako pentsioak

Alarguntasun-pentsioak eta kotizaziopeko pentsioak jasotzen dituzten 22.000 pentsionista ingururi eragingo dieten neurri horiez gain, Errenta Bermatua 65 urtetik gorakoei zabaldu izanari esker, zenbatesten da laguntzako pentsioak jaso eta Errenta Bermatua baino kopuru txikiagoak jasotzen dituzten 1.300 familia-unitatek prestazio horretan ezarritako zenbatekora arteko aldea estaliko duen osagarri ekonomikoa jasoko dutela 2017an. Gizarteratzeko eta Errenta Bermaturako Eskubideari buruzko Foru Legearen Proiektuaren txosten ekonomikoan jasotzen denaren arabera, neurri horrek kolektibo horri bideratutako urteko 5 milioi euro inguruko inbertsio soziala eskatzen du.