Foru erakundeek Nafarroako Errege eta Erreginak omendu dituzte gaur, igandea, duela lau hamarkada urtero egiten duten moduan. Ekitaldia Leireko San Salvador Monasterioko elizan izan da, lehen erregeen gorpuzkiak gordetzen dituen mausoleoaren aurrean.

Ekitaldia zibila da eta publikoari irekita dago. Segizio ofiziala elizara heldu direnean hasi da. Honako hauek osatu dute: eskaintzak zeramatzaten giltzariek, mazolariek eta arma-erregeak, eta agintariek: Nafarroako Lehendakaria, Uxue Barkos; Parlamentuko lehendakaria, Ainhoa Aznarez, eta Gobernuko kontseilariak.

Monasterioko abade mitradun Juan Manuel Apesteguiak agintariak agurtu ditu eta errege-panteoiaren zeuden tokietan eseri dira, Iruñeko erresumako lehen errege-erreginen gorpuzkiak dauden tokian. Iruñeko erresuma Nafarroako erresumako aitzindaria izan zen, eta erregeen artean hauek daude: Eneko Aritza (Iruñeko lehen erregea, IX. mendea), Gartzia I.a Eneko (IX. mendea), Fortun Gartzia I.a (Iñigotarren dinastiako azken erregea, IX. mendea), Antso I.a Gartzez (X. mendea), Gartzia I.a Nafarroakoa (X. mendea) eta Antso II.a Gartzez Abarka (X. mendea).

Ondoren testu bat irakurri du Eloísa Ramírez Vaquero historialariak, gaztelaniaz eta euskaraz, Leirek Nafarroako historian duen eginkizuna laburtzen duena. Hain zuzen, erresumako hastapenen memoriarekin lotuta geratuko dela eta Aritza dinastiaren gune espiritual eta intelektual gisa finkatuko dela esan du. "Leire, errege-familiaren jatorrizko gune izango da beti, eta erresuma beraren erreferente historikoa", gaineratu du historialariak. Testuan ere esaten da 1973. urtetik Nafarroako erakundeen antzinako erresumako errege-erreginei egiten dieten omenaldia Leiren egiten dela, "hamabi mende baino gehiagotan bizirik egon den giza eta lurralde multzo bat eraiki zutenak goraipatzeko, Nafarroaren oraina eta etorkizuna bultzatzen duen ondarea delako".

Ondoren, Barkos Lehendakariak eskaintza egin du: panteoiaren hesiaren aurrean lore gorriz osatutako koro bat utzi du, legenda honekin: "Navarra a sus reyes y reinas. Nafarroak, bere errege-erreginei". Bestalde, Parlamentuko lehendakariak Iura Vasconiae bildumako ‘Nafarroako Zuzenbide Zibilaren kodifikazioruntz Sinposiumaren’ txostenak jasotzen dituen liburua eskaini dio monasterioari. Azkenik, Gobernuko lehen lehendakariordeak, Manu Ayerdik, zilarrezko kutxatila eman du, foru gobernuaren dohaintzarekin, monjeei mausoleoa zaintzeagatik eskertzeko.

Behin ekitaldia amaituta ostatura joan dira eta han dantza-ikuskizun bat egon da Luzaideko Bolanteekin. Horrela, Martxa, Bolant Dantza eta Lauetan Erdizka dantzak eta Jauziak direlakoak egin dituzte.