Gaurko saioan, Foru Gobernuak Gardentasunaren, informazio publikoa eskuratzearen eta gobernu onaren Foru Legearen proiektua onartu du, aurreproiektuaren zirriborroko parte-hartze publikorako prozesua abenduaren 15ean amaitu ondoren.

Testu horren xedea da jardun publikoko eta gobernu-jarduneko gardentasuna arautu eta bultzatzea, informazio publikoa eskuratzeko eskubidea benetan gauzatu dadin bermatzea, interes-taldeak arautzea, eta gobernu ona bermatuko duen arau-multzo bat ezartzea.

Onarpen horren ondoren, testua Nafarroako Parlamentura bidaliko da, eztabaidatu dadin eta, hala badagokio, onar dadin.

Ekarpenak

Aurreproiektua publikoki erakutsi da azaroaren 27tik abenduaren 15era arte, eta, epe horretan, Nafarroako Gobernuko departamentuen, Nafarroako toki-erakundeen, NUKFren eta herritarren ekarpenak jaso dira.

Halaber, testuak Toki Araubidearen Foru Batzordearen aldeko txostena du, bai eta Nafarroako Gardentasunaren Kontseiluarena ere, zeinak oharrak eta proposamenak egin baititu hobetzeko asmoz.

Edukia

Proiektu honek Nafarroako Foru Komunitateko Administrazioaz harago hedatzen du Legearen aplikazio-esparrua; izan ere, erakunde guztiei eragiten die, izan publikoak (hala nola Nafarroako Unibertsitate Publikoa) edo pribatuak (bai informazio publikoaren gordetzaileak, bai funts publikoekin finantzatzen direnak eta funts publikoekin finantzatzen diren zerbitzu publikoen kudeaketan parte hartzen dutenak).

Testuak egituratu eta zabaldu egiten ditu publizitate aktiborako betebeharrak, eta informazio-mota hauek hartzen ditu barnean: erakunde-, antolaketa- eta plangintza-informazio garrantzitsua; goi-kargudunei eta zuzendariei buruzko informazioa; garrantzi juridikoko informazioa; ekonomia-, aurrekontu- eta finantza-informazioa; kontratazio publikoari, zerbitzuak emateari, hitzarmenei eta diru-laguntzen arloko jarduerari buruzko informazioa; eta lurralde-antolaketaren, hirigintzaren, ingurumenaren eta etxebizitzaren arloetako informazioa.

Proiektu honek oztopoak kentzen ditu, informazio publikoa eskuratzeko eskubidea benetan gauzatu dadin, eta eskubide hori gauzatzeko prozedura arin eta erraza orokortzen du.

Gainera, arau-hausteen eta zehazpenen araubide bat txertatzen du, eta informazio publikoa eskuratzeko eskubidearen bermeak areagotzen ditu.

Esaten du, halaber, Nafarroako Gobernuko kideek eta Nafarroako Foru Komunitateko Administrazioko goi-kargudunek interes orokorrari eta kudeaketa gardenari jarraikiz jokatu behar dutela.

Azkenik, Nafarroako Gardentasunaren Kontseiluaren izaera, osaera eta funtzioak zehazten ditu —organo horrek bermatzen du gardentasuna Nafarroako Foru Komunitatean—.