Sanz Presidenteak San Joan Ospitalarien Ordenari entregatu dio Solidaritateko "Nafarroa" Nazioarteko VI. Saria asteazkena, 2007.eko otsailak 7

Mundu guztiko gaixoei eta behartsuei abegia eta laguntza eskaintzen die

Donatus Forkan Anaia, Sanz Presidentearen eta Jose Mª Otaegui jaunaren eskutik saria jaso ondoren. ( irudia handitu )

Nafarroako Gobernuko Presidenteak, Miguel Sanz Sesmak, gaur San Joan Ospitalarien Ordenari Solidaritateko "Nafarroa" Nazioarteko VI. Saria entregatu dio, bizitza guztia mundu guztiko gaixoak eta behartsuei laguntza emateagatik. Nafarroako Gobernuak eta Euskadiko Kutxak batera sustatutako saria da eta oraingo honetan Donatus Forkan Anaiak jaso du, Ordenaren Anaia Nagusia.

Ekitaldian Euskadiko Kutxako presidenteak, Juan Mª Otaegui Murua, Gizarte Ongizate, Kirol eta Gazteria Departamentuko kontseilariak, María Isabel García Malo, eta Miguel Induráin jaunak hartu dute parte, azken hura Epaimahairen buru gisa. Adierazitako ekitaldia Nafarroako Jauregian antolatu da goiz honetan.

Sariaren helburua honakoa da: (aurtengo seigarren edizioa da) pertsonek eta erakundeek, babesik gabeko gizarte sektoreen eta herrien alde, egiten duten lan boluntarioa aitortzea eta zabaltzea eta, era horretan, gizartea lan horren garrantziari buruz sentsibilizatzea. Saria 29.000 euro (Nafarroako Gobernuak eta Euskadiko Kutxak %50 bana ekartzen dute), Jorge Oteizaren "Arri Ernai Zaitzailea" eskulturako erreprodukzio bat eta diploma bat da.

Forkan Sanz Presidentearekin, García Malo kontseilariarekin eta Epaimahaiaren kideekin. ( irudia handitu )

Sanz Presidenteak bere hitzaldian aipatu du "giza garapenaren kontzeptuak dioela (Milurtekoaren Garapeneko Xedetarako azken oinarria), beste ezer baino lehen, gizakia garapen prozesuen erdi-erdian kokatu behar dela; eta horixe bera dela San Joan Ospitalarien Ordenak burutzen duen lanak erakusten diguna. Profesionalak eta boluntarioak aktibo garrantzitsuena dira; langileen profesionaltasunak, prestakuntzak edo proiektuen inplikazioak horrela adierazten digute; eta lan boluntarioari dagokionez, altruismo eta borondate oneko sentimenduak ikasteko nahiak, sufritzen ari diren pertsonekiko errukitzeko gaitasunak, eta horiek laguntzeko inplikazioak, berriro ere, argi erakusten digute Ordenak burutzen duen lanak bertaratutako gizarteak gizatiartzearen alde".

"Baina garrantzitsuena- adierazi du Sanz Presidenteak- laguntzen duten pertsona bakoitzaren duintasuna aitortzea da. Hura dute zentroetako berezko ezaugarri; horregatik ikus dezakegu zentro horietan kaletan jasotako pertsonak, premia gorrian dauden pertsonak, babesik gabeko adimen-gaixotasunak dituzten pertsonak, laguntzarik jasotzen ez duten zaharrak bertan hartzen eta laguntzen dituztela, pertsona gisako duintasuna eta euren gaitasunarekiko sinesgarritasuna berreskuratuz. Hori dela eta, zentroen funtzionamenduan inplikatzen dituztenean, bakoitzak ahal duena ekartzen du, galdutako auto-estimua berreskuratuz".

Sanz Presidenteak tokiko laguntzaileei eta egileei ere eskerrak eman dizkie, izan ere, Nafarroan ezarritako Garapeneko gobernuz kanpoko 29 erakundeen bidez, "osasunarekin lotutako Milurtekoaren Garapeneko Xedeak lortzearen alde egiteko aukera izan dugu". Horri dagokionez, Miguel Sanz jaunak gogora ekarri du Foru Erkidegoak, nazioarteko osasun lankidetzaren esparruan, burutzen duena lana eta adierazi du "Nafarroako gizarteak garatzen ari diren herrialde guztiekin hartutako konpromisoa lankidetza proiektuetarako funts publikoak erabiltzean datzala. Eta horri dagokionez, Nafarroako Gobernuak, duela hamabost urte baino gehiago Garapeneko Laguntza Ofizialeko programa hasi zuenetik, ia 140 milioi euro inbertitu ditu hamaika proiektutan, nazioarteko lankidetzako sektore guztietan. 2007. urtean 19 milioi euro baino gehiago inbertituko ditu herrialde horietako Giza Garapenean".

Konpromisoa babesik gabeko pertsonekin

Bestalde, Juan Mª Otaegui Euskadiko Kutxako presidenteak adierazi du pozik dagoela sari hau Nafarroako Gobernuarekin batera antolatzeagatik eta sari hau jaso zuen lehenengoak Muhammad Yunus, Bakearen Nobel Saria jaso izategatik. Halaber, Otaegui jaunak nabarmendu ditu Nafarroako Gobernuak, aurrekontu publikoetatik, garapen lankidetza esparruan egindako ekarpenak, eta horrek Nafarroako gizarteak hartutako konpromiso solidarioa agerian uzten duela. Donatus Forkan Anaiari zuzenduta, Ordena zoriondu du "sari hau merezi baitu", baita bere fundatzailea ere, Juan Ciudad edo Jainkoaren San Joan, "behartsuen zerbitzua pribilegio eta bizimodu bilakatu zuelako". Era berean, eskerrak eman dizkie Ordena osatzen duten guztiei "etengabe solidaritatea, errukia eta sentsibilitatea adierazten ari direlako eta euren bizitzekin ematen diguten ereduarengatik".

Otaegui jaunak azpimarratu du "Ordenak, bostehun urtez inguru garatu dituen balioak gaur egun indarrean daudela eta egungo gizartean indarrean egotea egiaztatzen dutela" eta, gaixoei dagokienez, aipatu du "pertsona ezin dugu patologiaren arabera bakarrik sailkatu, gizaki gisa ikusi behar dugu bere osotasunean eta bere gaitzan lagundu behar dugu". Horri dagokionez, nabarmendu du "Ordenak pertsona guztiak merezi duten errespetuekin tratatzen dutela, gizakiak direlako".

Epaimahaiaren presidenteak (Miguel Indurain txirrindulari ohia) saria emateko akta irakurri ondoren, Sanz Presidenteak eta Juan Mª Otaegui jaunak Donatus Forkan Anaiari saria entregatu diote. Azken horrek esan du bere Ordenarentzat ohore handia dela sari hori jasotzea, eta eskerrak eman dizkio Nafarroako Gobernuari, Euskadiko Kutxari, Epaimahaiari eta Nafarroako Erizainen Elkargo Ofizialari, azken horri bere kandidatura proposatzeagatik. Sarira proposatutako gainontzeko erakundeak gogora ekarri eta zoriondu ondoren, Forkan-ek Ordenaren jatorri espainiarra gogoratu du. Aipatutako Ordena, sortu zenetik gaur arte Lurreko babesik gabekoei laguntza eskaini die, eta bere jarduera osasun laguntzan eta osasunaren sustapenean murgildu du. Halaber, Nafarroako Gobernuari eskerrak eman dizkio Afrika eta Hego Amerikako proiektuen garapenean izandako solidaritate eta lankidetzarengatik, baita Euskadiko Kutxari ere, babesik gabeko pertsonen alde hartutako gizarte konpromisoarengatik.

García Malo kontseilariak ere ekitaldian hartu du parte. Malo andreak gogoratu du urtarrilean Quitoko San Joan abegi-etxera egindako bisita, Ekuadorrera egindako bidai batean, Nafarroako Gobernuak bertan finantzatutako lankidetza proiektuak behar bezala gartzen ari zirela egiaztatzeko. Hain zuzen ere, aipatu du "bertan egiaztatu zuela anaiek eta laguntzaileek burutzen duten lan bikaina, eskaintzen zuten maitasuna, inplikazioa eta konpromisoa, eta ikusi zuela, pertsonen bizitza hobetzeko asmoa zutela, pertsona horiek ez baitzuten ezer. Pertsona horiek duintasunez hartzen eta laguntzen dituzte zentroan itxaropena eskainiz. Harrituta gelditu nintzen hainbesteko ilusioak, laguntzak eta gestio onak, babesik gabeko, adimen gaixotasunak dituzten, drogamenpekotasuneko arazoak dituzten eta baliabide ekonomikorik ez duten pertsonengan eta laburbilduz, pertsona ahulenengan hainbeste onura sortzen zituztela ikustean·.

Ekitaldiaren musika Iruñako Katedraleko Kapearen ganbera abesbatzaren eta ganbera orkestraren eskutik izan da, Aurelio Sagaseta jaunak zuzenduta. Horiek "Regina caeli" (XVII. mendeko gregorianoa eta polifonia, J. García de Salazar-ena), "Nere maitia" (XVIII. mendeko Baraibarreko herri melodia), eta Irlandako "The Londonderry air" herri melodia jo dute.

Donatus Forkan Anaia, San Joan Ospitalarien Ordenaren Anaia Nagusia

Donatus Forkan Anaia (Irlandan, 1942ko apirilaren 5a) San Joan Ospitalarien Anaia Nagusia da 2006ko urritik.

Erizain espezializatua da eta diploma Erromako Ordenaren Nazioarteko Elkargoan jaso zuen. Ondoren, bere ikasketak Seulen eta Irlandan burutu zituen. Hogei urtez baino gehiago bere ospitale-bokazioa Korean garatu du, eta aldi berean, hainbat erantzukizun hartu du gain prestakuntzako bokaziozko pastoralaren esparruan, ordezkari probintzial gisa, 1989 eta 1992 bitartean.

San Joan Ospitalarien Ordena

San Joan Ospitalarien Ordena (Nafarroako Erizainen Elkargo Ofizialak bere kandidatura proposatu zuen) irabazi-asmorik gabeko lankidetzako nazioarteko erakunde handienetariko bat da. Harrera kontzeptupean, garai eta gizarte bakoitzaren ahulenak hartzen, osasuna suspertzen, laguntzen eta konpromisoaren alde egiten da, unibertsaltasun kontzeptutik abiatuz eta profesionaltasunaren alde eginez. Bere helburua pertsona ahulenak laguntzea da, bai gaixorik daudelako edo bai baliabiderik ez dutelako. Horretarako, gizarte laguntza eta osasuneko nazioarteko programak abian jartzen eta garatzen dituzte.

Bere lana laguntza zentrotan, ospitaletan, osasun etxetan, gizarte zerbitzuetan eta erlijio komunitatetan islatzen da. Ordena bost kontinentetako berrogeita hamar herrialdetan dago eta urtero 20 milioi laguntza baino gehiago eskaintzen ditu. Egunero, batez besteko 54.000 pertsona laguntzen ditu.

Hain zuzen ere, San Joan Ospitalarien Anaiek 298 zentroetan lan egiten dute, Ordenaren gizarte jardueraren sei mailen arabera banatuta: zaharren zerbitzuetarako 35 zentro, oinarrizko osasun zerbitzuko 42 zentro, adimen gaixoentzako 46 zentro, minusbaliatuentzako 70 zentro, ospitaleko 71 zentro, eta gizarteko eta laguntzako 34 zentro. Horietatik, 21 Afrikan, 48 Amerikan, 6 Indian eta bat Txinan daude.

Ordena Granadan sortu zen 1539. urtean. Hasieran Espainian eta Italian bakarrik egin zuten lan. XVII. mendetik aurrera, Amerikarantz hedatu zen, Espainiako koloniak jarraituz. Baita Europarantz ere. XX. mendean zehar, Afrikara, Asiara eta Ozeaniara hedatu zen. XXI. mendean hazten jarraitzen du: Txinan zainketa aringarrietarako zentro bat inauguratu da eta Hondurasen Adimen Osasuneko Zentro bat eraikitzeko proiektua dago.

Gaur egun, 1.231 anaiek osatzen dute Ordena, 40.000 laguntzaile baino gehiagorekin (langileak eta boluntarioak) eta 300.000 ongile eta emaile baino gehiagorekin batera. Horietaz gain, 5.074 boluntarioen laguntza jasotzen dute. Horiek batez besteko 158 ordu ematen dituzte urtean, pertsonak laguntzen.

Solidaritateko "Nafarroa" Nazioarteko Saria

Sariaren lehengo edizioan, 2002. urtean, Muhammad Yunus-ek irabazi zuen, "behartsuen bankaria" izenekoa eta garapen-bidetan dauden herrietan mikro kredituak sortu zituena. Bigarren edizioan, Kalkutako Teresak sortutako Karitateko Misiolarien Kongregazioak irabazi zuen saria. Hirugarrenean, berriz, Errefuxiatuen Jesuiten Zerbitzua saritu zen, eta laugarrenean, UNASO-ri, Ugandako HIESA aurka borrokatzen duten erakundeen sarea. Eta bosgarren eta azkeneko edizioan, saria "Fe y Alegría" nazioarteko jesuiten federazioari eman zitzaion, herri hezkuntza integralean eta gizarte sustapenean aditua.

Saria araupetzen duten oinarrien arabera, sariak pertsonek, erakundeek eta gobernuz kanpoko erakundeek burututako lana saritu eta aitortu behar du. Aipatutako lanak, esparrua edozein izanda ere, pertsonen eta familien oinarrizko premiak asetzea izan behar du helburu, gizarte, kultura, ekonomia, teknikak edo giza eskubideen defentsa arloko jardueren bidez, gutxienez, hiru urteko etenik gabeko epean.

Irabazi-asmorik gabeko edozein pertsona fisikok edo erakundek edo instituziok sari hau irabaz dezake, bertako ia kide guztiak boluntarioak badira. Proposamenak edozein herrialdeko erakunde publikoen (gobernuak, ministerioak, udalak, unibertsitateak, akademiak, ikerketa zentroak, enbaxadak, kontsulatuak etab.) edo hezkuntza, kultura, gizarte, GKE edo legearen arabera aitortutako beste edozein erakunderen bidez egin daitezke.

Dokumentazioa:: 0702pe-1-eusk.doc

Jar zaitez gurekin harremanetan | Erabilerraztasuna | Lege abisua | Webaren mapa