Eszena 2008 Jaialdiaren baitan, Marina Donderis eta Mar Gómezen konpainietako ikuskizunak aurkeztuko dituzte asteburu honetan osteguna, 2008.eko apirilak 17

Gainera, Aldanza, Tempomobile eta CIC L'explose konpainiek ere eskainiko dituzte emanaldiak

Marina Donderis Danzak "Amor en Re" aurkezten du. ( irudia handitu )

Eszena 2008 Jaialdiko programazioaren baitan, asteburu honetan, bi berritasun aurkeztuko dituzte: Marina Donderisen konpainiak "Amor en Re" aurkeztuko du, Antsoainen; Mar Gómezen konpainiak, berriz, "Dios menguante", Arangurenen. Bestalde, Aldanza, Tempomobile eta CIC L’explose konpainiek ere eskainiko dituzte emanaldiak, Caparroso, Lodosa eta Zangozan, hurrenez hurren.

"Marina Donderis Danza" konpainiak "Amor en Re" aurkeztuko du, bihar (ostirala, apirilaren 18a), 22:00etan, Antsoaingo Antzokian. "Amor en Re" zuzeneko musika duen dantza ikuskizuna da, eta errealitatearen eta fantasiaren arteko muga aztertzen du, maitasunaren eta sexuaren arteko muga, gorputzaren eta arimaren artekoa, tradizioaren eta abangoardiaren artekoa. Musikari dagokionez, Chopin, Satié, Kachaturian edo Fauréren lanak hautatu dituzte. Partitura batzuk jatorrizko bertsioan jotzen dituzte, eta beste musika lan batzuetarako, berriz, bertsioak egin dituzte. Piano eta ahots laukoteak zuzenean jotzen ditu lanak.

"Marina Donderis Danza" taldearen sortzaile eta zuzendari artistikoa Marina Donderis bera da. Dantza klasikoko ikasketak egin zituen, Valentziako Dantza Kontserbatorioan. Ramón Soléren konpainian (Bartzelonan), Bartzelonako Lizeoko Antzoki Handiko Konpainian, eta Ballet Klasiko Nazionalean (Madrilen) dantzatu izan du, besteak beste. 1993an, Indiara joan zen, dantza garaikidearen eta bertako dantza klasikoaren arteko fusioa ikertzeko. 1996an, New Yorkera joan zen, eta koreografiako ikasketak egin zituen, hiru urtez. Beste arte diziplina batzuetan ere jardun izan da, hala nola modan, ikusizko artean, arte plastikoan, performance delakoan, eta olerkigintzan, besteak beste. "Amor en Re" konpainiaren azken ekoizpena da.

Mar Gómezek, berriz, "Dios menguante" aurkeztuko du, dantza, antzerkia, umorea eta olerkia nahasten dituen ikuskizuna, igandean (apirilaren 20a), 20:00etan, Arangurenen.

Mar Gómez konpainia 1992an sortu zuten, ikuskizun berean sari bana jaso zuten bi koreografia bildu zituztenean; hau da, Madrilgo Koreografia Lehiaketan eta Bartzelonako Ricard Moragas Lehiaketan saritutako bi lan ikuskizun berean eskaini zituztenean. Harrezkero, azkeneko hamabost urteetan, ikuskizun asko sortu ditu konpainiak, hainbat formatutan. Iraupen luzeko azken koreografien artean honako hauek nabarmendu ditzakegu: "Hay un pícaro en el corral" (2000n Valentziako Grec/Dansa Jaialdian saria jaso zuena); "La casa de l’est" (2002an TNCrekin -Teatre Nacional de Catalunya- ekoitzi zutena); eta "Después te lo cuento" (2004an Forumekin batera ekoitzi zutena). Halaber, bestelako lan batzuk ere azpimarratu ditzakegu: lan labur ugari, kalean egindako lanak, TV3 telebista katearekin egindako ekoizpenak, eta "El ganso" operaren estreinaldiko zuzendaritza eta eszenaratzea (Gran Teatre del Liceu antzokian). 2006az geroztik, Prat de Llobregateko Teatre Modern antzokian du egoitza konpainiak.

Dokumentazioa:: Berri osoa.doc

Jar zaitez gurekin harremanetan | Erabilerraztasuna | Lege abisua | Webaren mapa