Castellano | Euskara | Français | English
Ezagutzera eman
Ikusi egun honetako albiste gehiago
Roig kontseilariak programa aitzindari bat aurkeztu du, langileek eta langabeek hizkuntzak ikasteko ostirala, 2008.eko apirilak 18
"Lingua Empresa" proiektuak 5 milioi euroko aurrekontua du, enpresen lehiakortasuna areagotzeko eta nazioartekotu daitezen bultzatzeko
Roig kontseilaria , hizkuntza zerbitzuetako nafar enpresariekin.
(
irudia handitu
)
José María Roig Berrikuntza, Enpresa eta Enplegu Departamentuko kontseilariak hizkuntzak ikasteko programa berri bat aurkeztu die, gaur goizean, hizkuntza zerbitzuetako nafar enpresei. "Lingua Empresa" izeneko programari buruz ari gara; hots, langileek eta langabeek atzerriko hizkuntzak ikas ditzaten bultzatzea helburu duen programari buruz. Horretarako, 5 milioi euroko aurrekontua izanen du, datozen lau urteetan (2008-2011).
"Lingua Empresa" proiektuak Nafarroako Gobernua du buru, Nafarroako Enplegu Zerbitzuaren bidez eta CEIN Nafarroako Enpresen eta Berrikuntzaren Europar Zentroaren lankidetzarekin. Proiektuak enpresen lehiakortasuna areagotzea eta nazioartekotu daitezen sustatzea ditu helburu, langileek hizkuntzak ikastea xede duen politikaren bidez.
Aurkezpen ekitaldia Nafarroako Artxibo Orokorrean egin dute, eta bertara bildu dira honako hauek ere: Cristina Arcaya Nafarroako Enplegu Zerbitzuko Enpleguaren eta Trebakuntzaren Behatokiko zuzendaria, eta Beatriz Blasco CEIN Zentroko Enpresen saileko zuzendaria.
"Lingua Empresa" programa hizkuntza zerbitzuen hornitzaile eta eskatzaileei, trebakuntzaren arloko profesionalei, ikasleei, Administrazioari eta arlo horrekin zerikusia duten beste eragile batzuei zuzenduta dago.
Jardunaldian programaren helburuen eta lan planaren berri eman dute. Hasteko, diagnostikoa eginen dute, 2008an zehar, eta horretarako, hizkuntza zerbitzuen hornitzaileen laguntza izanen dute (profesionalen eta enpresen laguntza).
Programak Hizkuntzetarako Europar Erreferentzia Esparrua eta Hizkuntzen Europar Portfolioa hartu ditu eredu; hau da, atzerriko hizkuntzak ikasi, irakatsi eta ebaluatzeko elementuak aztertzen dituzten dokumentuak.
Hizkuntzen ikaskuntzak honako printzipio hauek izanen ditu oinarri: eleaniztasuna, bizitza osoan zehar ikastea, nork bere kontura ikastea, egintzari begirako ikuspegia, zereginen araberako ikuspegia, helburu partzialak helburu orokorrak erdiesteko bide gisa, hizkuntza gaikuntzaren diagnostikoa eta emaitzen ebaluazioa.
