Castellano | Euskara | Français | English
Ezagutzera eman
Ikusi egun honetako albiste gehiago
Euskarabideak Toponimiaren Kongresu Nazionalean parte hartu du Madrilen asteartea, 2009.eko martxoak 24
Nafarroako Foru Komunitatean toponimiaren arloan egindako lana aurkeztuko du
Xabier Azanza Euskarabideako zuzendari gerenteak gaur goizean “Nafarroako Foru Komunitateko toponimia” izeneko txostena aurkeztu du Izen Geografikoen Batzorde Espezializatuaren II. Jardunaldian, Institutu Geografiko Nazionalak eta Unibertsitate Konplutentseak deituta.
Izen Geografikoen Batzorde Nazional Espezializatuaren zuzendaritzapean, Toponimiari buruzko bigarren jardunaldi honen izenburua “Toponimiaren erabilera normalizatuaren garrantzia” da, eta Andaluzia, Kanariak, Gaztela eta Leon eta Nafarroako autonomia-erkidegoetan toponimia arloan egindako lana, normalizazioaren oinarrizko printzipioak eta izen geografikoen erabilera normalizatuaren garrantzia, datu espazialen azpiegiturak, komunikabideak eta geografia aurkeztu dira.
Programako hitzaldietan eta mahai-inguruan adituak egon dira, toponimiaren gaur egungo egoera eta Espainiako toponimiaren normalizazioaren etorkizuna alderdi desberdinetatik jorratzeko.
Nafarroako toponimiaren egoerari buruz, Xabier Azanzak, besteak beste, toponimia bildu eta sistematizatzeko egin den lana nabarmendu du. Lan hori 60 liburukitan argitaratu da, “Toponimia Menor Oficial de Navarra” izenburupean, eta interneten ere ikusgai dago. Horrez gain, Nafarroako Lurralde Informazioaren Sistema (SITNA) geoataria ere azpimarratu du.
Izen Geografikoen Batzorde Espezializatua (IGBE) Kontseilu Geografiko Gorenaren barruan dago, eta izen geografikoekin lotutako erabakiak hartzerakoan azterlanak eta proposamenak egitearen ardura du. IGBEko kideak dira Estatuko Administrazio Nagusiko eta autonomia-erkidegoetako izen geografikoen arloko agintarien ordezkariak, baita unibertsitate, akademia eta toponimiarekin lotutako bestelako erakundeetako ordezkariak ere. Helburu nagusiak Espainian toponimiaren normalizazioa bultzatzea, organismo eskudunekin lankidetzan, eta izen geografikoen ezagutza, erabilera normalizatua eta kultura-ondare moduan duten balioa sustatzea dira.
Bestalde, Sustapen Ministerioaren barruko Institutu Geografiko Nazionalaren eskumenak dira autonomia-erkidego batean baino gehiagotan eragina duten izen geografikoak, Izen Geografikoen Batzorde Espezializatuaren txostena jaso ondoren; toponimia ofiziala normalizatu eta zabaltzea eragile eskudunekin lankidetzan; Espainiako Oinarrizko Izendegi Geografikoa eratu eta onestea, 1:25.000 kartografian oinarrituta (edo eskala txikiagoetan); Mapa Topografiko Nazionaleko toponimiaren datu-baseak eratzea, horien normalizazio-irizpideekin batera; Izendegi Geografiko Nazionala inskribatzea eta toponimia ofiziala bildu, normalizatu eta zabaltzea.
Jardunaldia hurrengo hauek aurkeztu dute: Dámaso López García Madrileko Unibertsitate Konplutentseko dekanoa; Alberto Sereno Álvarez Institutu Geografiko Nazionaleko zuzendaria eta Geografiako Kontseilu Nazionaleko presidenteordea; Rafael Martín de Agar Izen Geografikoen Batzorde Espezializatuko presidentea; Fernando Lázaro Mora Espainierako eta Literaturaren Teoriako eta Literatura Konparatuko Departamentuaren zuzendaria; eta Manuel Alvar Ezquerra, Batzorde Antolatzailearen presidentea.
Programan nazioarteko, nazioko, autonomia-erkidegoko eta tokiko txostenak jaso dira, baita arloari lotutako bestelako gaiak ere, hala nola komunikabideak. Amaitzeko, “Espainiako toponimiaren normalizazioari buruzko etorkizuneko ikuspegiak” izeneko mahai-ingurua egin da, Joan Capdevila i Subirana Institutu Geografiko Nazionalaren Kataluniako Eskualde Zerbitzuko zuzendariak moderatuta.
