Guztira, eta behin-behineko datuak ez diren arren, atzo, asteartea, ekainak 22, itxi zen 2009ko errentaren kanpainan 322.487 aitorpen erregistratu dira guztira, baina ziurrenik 334.000ra iritsiko dira. Egindako aitorpenen %75 itzultzekoak izan dira –239.661–, eta gainerako 82.826 ordaintzekoak. Ogasunak itzultzeen %95 egin du –227.403–, eta zergadunen kontuetan 206,8 milioi euro sartu dira guztira. Batez beste itzulitako kopurua 909 euro izan da.

Horiek dira 2009ko errentaren kanpainako behin-behineko datu batzuk. Álvaro Miranda Simavilla bigarren presidenteordeak eta Ekonomia eta Ogasun kontseilariak prentsaurrekoan eskaini ditu gaur, eta José Ignacio Pérez de Albéniz Nafarroako Ogasuneko zuzendari kudeatzailea izan du alboan.

Miranda kontseilariak adierazi duenez, errentaren kanpaina "normaltasun osoz" garatu da. Gaur aurkeztutako datuak modu positiboan baloratu ditu, batez ere Ogasunak zergadunei dirua itzultzeko izandako bizkortasunari buruzkoak eta herritarrek eskainitako zerbitzuaren aurrean agertutako poztasun mailari buruzkoak.

Aipatzekoa da aurten Ogasunak 183.242 aitorpen-proposamen bidali dituela etxebizitzetara, eta horietatik %86 onartu dituztela. Horrez gain, 2008ko kanpainarekin alderatuz, Internetetik egindako aitorpenen kopuruak %4,7 egin du gora.

Orain arte erregistratutako 322.487 aitorpenetatik 157.653 etxebizitzara bidalitako proposamenei dagozkie, hau da, kopuru osoaren %48,9. Bestalde, orain arte erregistratutako aitorpenen %27,7 –89.245– entitate laguntzaileetan egin dira. Amaitzeko, %12,5 – 40.415– Internet bidez egin dira; %9,1 –29.520– Ogasunaren bulegoetan, eta gainerako %1,7 eskuz egindako aitorpenak izan dira –5.654–.

Errentaren kanpainako web orrirako sarbideak asko handitu dira iazko urtearekin alderatuz gero. Zehatz esanda, 308.104 sarrera baino gehiago erregistratu dira, hau da, %23ko hazkundea izan dute aurreko kanpainarekin alderatuta. Sarrerak 123.615 gizabanakori dagozkio. Hona hemen herritarrek gehien erabilitako zerbitzuak: "zenbat ateratzen zait" programa, 77.237 sarbiderekin; datu fiskalen kontsulta, 59.999 sarbiderekin; eta aitorpena berriz inprimatzea, 46.098 sarbiderekin.

Ogasunak telefono bidez egindako inkestari dagokionez –625 herritarri egin zitzaien kanpainan eskainitako zerbitzua baloratzeko eta hobetzeko puntuak identifikatzeko–, emaitzei erreparatuz gero, zergadunen %84 "pozik" edo "oso pozik" dago 2009ko errentaren kanpainarekin, eta %4k baino ez dio "ez dagoela pozik". Gainera, inkestari erantzun dioten 10 herritarretik 9ri datorren urtean aitorpen-proposamena etxebizitzan jasotzea gustatuko litzaieke.