María Kutz Peironcely Osasun kontseilaria Nafarroako Osasun Zerbitzuko Ospitale Gune berria sortzen duen foru-dekretua indarrean jartzeko ekitaldi instituzionalaren buru izan da gaur goizean. Sinbolo horrek Iruñerriko ospitaleak bateratzen ditu.

Horretarako, entitate berriaren logoa duen monolito bat aurkeztu da gaur goizean ospitalearen esparruan. Ekitaldian, Kutz kontseilariaz gain, Fernando Boneta Beorlegui Ospitale Guneko zuzendari kudeatzailea eta Virgen del Camino ospitaleko zuzendari ohia, Osasun Departamentuko zuzendaritzako kideak eta bateratze plana egin duen talde teknikoaren kideak egon dira (Kutz kontseilaria buru izan da eta bi ospitaleetako kideek osatu dute), baita Nafarroako Ospitaleko eta Virgen del Camino ospitaleko osasun arloko eta kudeaketa arloko langileak ere.

Nafarroako Ospitale Gunearen sinbolo berria Nafarroako Ospitalearen eraikinaren eta Vianako Printzea Kontsulta Zentroaren arteko lorategian kokatuta dago, Virgen del Camino ospitalearen aurrean. Logoa Gap´s enpresak sortu du, Nafarroako Gobernuaren sormen publizitatearen esleipendunak. 3x3 metro ditu, eta N bat du gorriz eta + sinboloa zuriz, goian kokatuta. Diseinatzaileen arabera, sinbolo erraza da: N hizkiak Nafarroa sinbolizatzen du, bateratze honen onuraduna, eta + sinboloak, osasun arloko gurutzea eta batasuna.

Monolitoa aurkeztu eta gero, Nafarroako Ospitaleko ekitaldien aretoan ekitaldi instituzionala egin da. Ekitaldi honetan, Boneta kontseilariak eta Fernando Arias doktoreak, Nafarroako Ospitale zaharreko Erradioterapia-Onkologia Zerbitzuko zuzendariak, parte hartu dute. Azken horrek Nafarroako Ospitale Gunearen izenean lehenengo lan zientifikoa zuzendu du eta Erradioterapia Onkologiako Europako hurrengo Kongresuan aurkeztuko dute.

Gunearen irudi berria aurkezteko ekitaldien aurretik, Virgen del Camino ospitaleko bosgarren solairuan (haurren ospitaleratzea) kontzertua eskaini du Madagaskargo "Agua de coco" neska-mutilen taldeak. Taldeak errezitala eskaini du pazienteentzat eta familiakoentzat.