Miguel Sanz Sesma Nafarroako Gobernuko Lehendakaria gaur goizean UAGN nekazaritza-erakundeko ordezkariekin bildu da, Félix Bariáin (idazkari nagusia), David Lezáun (presidenteordea) eta José Andrés Palacios (zuzendari kudeatzailea), lehen sektoreak Nafarroan gaur egun duen egoera aztertzeko.

UAGNk Sanz Lehendakariari txosten bat eman dio, krisi ekonomikoak sektorean azken bi urteetan izan dituen ondorioak azalduz. Sanz Lehendakariak erakundeari jakinarazi dio Nafarroako Gobernuak nekazaritza arloarekin konpromisoa duela eta UAGNren interesa eta sektore estrategiko horren alde egindako lana eskertu ditu.

Horrez gain, nekazaritza-erakundeak Sanzi Aranzadin (Iruñea) nekazaritzaren interpretaziorako zentroa eraikitzeko proiektua aurkeztu dio. Zentro hori LGENF funtsekin (%65) eta Nafarroako Gobernuaren ekarpenekin (%15), Iruñeko Udaleko ekarpenekin (%15) eta UAGNren ekarpenekin (%5) finantzatuko litzateke. Bestalde, Sanz Lehendakariak proiektua Nafarroako Aurrekontu Orokorretan nola sar daitekeen aztertzeko konpromisoa hartu du, betiere, defizita murrizteko helburuekin bateragarria bada.

Sektorearen egoerari dagokionez, Sanzek adierazi du beharrezkoa dela eraldaketak egitea funtzionamendu- eta kapitalizazio-metodoetan, gaur egungo neurri kooperatibista zorrotzez harago, merkatuen gaur egungo baldintzetara hobeto egokitzeko.

Gainera, Lehendakariak adierazi du Nafarroako Gobernuak sektorearen alde lan egiteko borondatea duela. Konpromiso horren erakusgarri dira 2007an abian jarritako "nekazaritza sektoreko krisiaren aurreko Larrialdi Plana", errentei, inbertsioei eta sustapenei emandako laguntzak eta inbertsio publikoak, hala nola Nafarroako Ubidea. Azken hori dela bide, 57.300 hektarea lur ureztatu bihurtuko lirateke.

Laguntzei dagokienez, 2009an nekazaritza sektoreak egindako inbertsioen %42,25 diruz lagundu ziren, eta azpiegituren arloan Tuterako Nekazaritzako Elikagaien Hiriaren proiektua sendotu zen. Amaitzeko, nabarmentzekoa da Moderna Planaren arabera lehen sektorea eta sektore agroindustriala etorkizuneko puntu estrategikoetako bat dela.