María Kutz Peironcely Osasun kontseilariak eta Katy Pérez Equiza Ikerketa Biomedikorako Zentroko (IBZ) zuzendariak ikerketarako azpiegitura publiko hori eraikitzeko lanak zein egoeratan dauden azaldu dute gaur goizean. IBZ Nafarroa 2012 Planeko lehentasunezko jardunetako bat da eta 22 milioi euroko inbertsioa du.

Aurreikuspenen arabera, lanak 2011ko azarorako amaituko dira. Lanak 2009ko irailean hasi ziren. Orain arte, lanen %38 eginda dago. Lanak amaitu ondoren, eraikina ekipatu behar da eta, beraz, IBZ 2012ko apirilean abian jar daiteke.

Ekitaldi informatiboan Antonio Vaillo proiektuko arkitektoa egon da, baita beste ikerlari eta teknikari batzuk ere. Kontseilariaren arabera, ikerketa sektorea "estrategikoa" da Nafarroarako, eta Foru Komunitateko ekonomiaren osagai dibertsifikatzailea izango da.

Bestalde, Pérez Equizaren arabera, Ikerketa Biomedikorako Zentroak zein bertako plataforma teknologikoek eta laguntza unitateek bi helburu dituzte: batetik, Nafarroako Osasun Zerbitzuko ikerlariei teknologia horiek modu zentralizatu eta eraginkorrean eskaintzea ikerketa translazionala egin ahal izateko eta emaitzen kalitatea hobetzeko; eta bestetik, sektorearen beharrizan teknologikoak asetzea, egon dagoen teknologia osatuz eta Nafarroaren garapen ekonomikoari mesede eginez, I+G+b biosanitarioa bultzatzearen bidez.

Ildo horretatik, gaur jakinarazi dutenez, Osasun Departamentuaren estrategia ezagutzaren sorkuntza indartzea da, osasun sistema publikoaren ikerketa biomedikoa berariaz bultzatuz. Osasun arloko profesionalen oinarrizko hiru eginkizunak asistentzia, irakaskuntza eta ikerketa dira. Pérez Equizaren esanetan, ikerketa biomedikoa ezinbestekoa da ospitaleetan, "horri esker ezagutza, gure profesionalen eta osasun sistemaren ospea handitzen baitira, eta horrela talentua erakarri eta, batez ere, ezagutza praktika klinikora oso azkar eramaten baita; horri guztiari esker kalitate asistentziala hobetzen da, eta hori da, hain zuzen ere, ikerketaren funtsezko helburua".

IBZ Osasun Departamentuaren Ikerketa Biomedikorako 2008-2012 Planarekin koherentea da. Plan hori Foru Komunitateko ikerketa beharrizanetara egokitzen den eredu estrategiko bat definitzeko egin zen. Autonomia-erkidegoko, nazioko eta nazioarteko egoera aztertuta, agerian geratu zen Nafarroako Osasun Zerbitzuko profesionalei plataforma teknologiko berritzaileak eman behar zitzaizkiela, helburu nagusia osasun ikerketaren kalitatea hobetzea izanda. Plataforma horiek, gaur egun zentroetan sakabanatuta daudenak eta ikerketa biomedikoan teknologia berriak garatu direnez behar den bestekoak ez direnak, IBZn kokatuko dira, NOZren ikerketa zentralizatzeko eta ekipamenduak eta giza baliabideak optimizatzeko.