Javier Caballero Martínez Lehen presidenteordeak eta Lehendakaritza, Justizia eta Barne kontseilariak Kontsumoko Arbitraje Batzordeak kontsumitzaileak defendatzeko erreminta moduan duen garrantzia azpimarratu du gaur goizean. Kontseilariaren esanetan, kontsumitzailea egoera makurrean dago beti enpresa handiekin izaten dituen borroketan. Caballerok Arbitrajeari eta Kontsumoari buruzko II. Jardunaldia irekitzeko ekitaldian egin du gogoeta hori. Hain zuzen ere, jardunaldia gaur antolatu da Nafarroako Unibertsitate Publikoan (NUP).

Ekitaldiaren hasieran, presidenteordea pozik agertu da esparru honetan kontsumitzailearen defentsa eta arbitrajea azterketa akademikorako gai bihurtu direlako. NUPeko jardunaldia Nafarroako Gobernuak finantzatutako ikerketa-proiektu baten barruan kokatzen dela gogorarazi du, kontsumitzaileak eta erabiltzaileak defendatzeko 2006ko Foru Legeari lotuta.

Caballero kontseilariak azpimarratu duenez, gaur egun Kontsumoko Arbitraje Batzordeari atxikita dauden 997 enpresek "berme osagai gehigarri bat dute eta behar den moduan informatutako kontsumitzaileak berme hori kontuan hartu behar du eskuratzen dituen produktu edo zerbitzuen hornitzailea hautatzerakoan". Beraz, presidenteordearen iritziz, Nafarroako Gobernuak interes handia du 1993an sortutako batzorde hau mantentzeko.

Era berean, Caballerok adierazi zuen arbitraje-jarduera Justiziaren beste osagai bat dela, batzuetan osagarria eta beste batzuetan alternatiboa. Ogasun publikorako eta inplikatutako alderdientzako aurrezki garrantzitsua dakar, balio ekonomiko txikiko irain edo eztabaidengatik prozesu judizial luze eta garestiak sahesten dituelako. Gainera, gatazkak ebazteko sistema "azkar, malgu eta eraginkorra da".