Lehen lehendakariorde eta Lehendakaritza, Justizia eta Barne kontseilariak, Javier Caballero Martinezek, Nafarroako Foru Administrazioan eta Administrazioko erakunde autonomoetan lan egiten duten langileen 2011ko lan egutegia onartu du; egutegian epe administratiboak kontatzeko balio ez duten egunak zehaztu dituzte.

Egutegia gaur argitaratu dute Nafarroako Aldizkari Ofizialean. Zehaztu dituzte Foru Administrazioko langileen jaiegunak eta lanaldiaren banaketa (urtean 1.592 lan ordu dauzkate).

Oro har, Nafarroako Gobernuak egun hauek hartu ditu baliogabetzat: urtarrilaren 1a eta 6a (Urteberri eguna eta Errege eguna); apirilaren 21a, 22a eta 25a (Ostegun Santua, Ostiral Santua eta Pazko eguna); uztailaren 25a (Santiago eguna); abuztuaren 15a (Jasokundearen eguna); urriaren 12a (Espainiako festa nazionala; azaroaren 1a (Domu Santua); eta abenduaren 3a (Nafarroaren eguna, Xabierko San Frantzisko), 6a (Konstituzioaren eguna), 8 (Sortzez Garbiaren eguna) eta 26a (Gabonetako bigarren jaieguna, 25a igandea baita).

Iruñean lan egiten dutenek, gainera, jai izango dute uztailaren 6tik (12.00etatik) 9ra (San Fermin) eta azaroaren 29an (San Saturnino).

Iruñean lan egiten ez dutenek haien herriko zaindariaren jaietan ere ez dute lanik egin beharko jaiak hasten diren egunean hasi (12.00etan) eta hurrengo lau egunetan, baldin eta festak lehenago amaitzen ez badira.

Astelehenetik ostiralera egunero 7 ordu eta 20 minutu lan egingo dituzte, oro har.

Lansaio horiek ez zaizkie aplikatuko lansaio bereziak edo ordutegi konpentsazioak dituzten langileei eta ikastegi edo osasun zentroetara atxikitako langileei, lan egutegi espezifikoa dutelako