Miguel Sanz Sesma Nafarroako Lehendakariak Kasedan, Eslaban eta Galipentzun egindako zenbait lan bisitatu ditu gaur goizean, Juan Ramón Corpas Mauleón Kultura eta Turismo kontseilariak lagunduta. 10,15ean Kasedako Udalera iritsi dira eta Jesús Esparza herriko alkatea agurtu dute. Elkarrekin landa-hotel bat eraikiko den ingurua bisitatu dute, San Zoilo ermitaren ondoan.

11,00etan Galipentzu herrira joan dira eta bertan, Karmele Iriguibel alkatearekin batera, hirigune historikoko zenbait kale zeharkatu dituzte. Kaleotako zoladura oraintsu berritu da, modu tradizionalean, Nafarroako Gobernuaren Azpiegitura Planen finantzaketarekin. Jarraian Galipentzuko San Salvador eliza bisitatu dute, eraikinaren estalkia berritzeko lanak lehen eskutik ezagutzeko.

Ondoren Eslabara joan dira eta Félix Beriáin alkateak hartu ditu. Elkarrekin Santa Criz aztarnategi arkeologikoa eta zulaketetan aurkitutako gorpuzki nagusiak hartzen dituen nabea bisitatu dituzte. Bisitaren atal honetan Laura Alba Cuadrado Herri Lan kontseilaria ere egon da, gaur egun lanak Autovía del Pirineo SA sozietate emakidadunak finantzatzen baititu.

Bisitan, Sanz Lehendakariak pozik dagoela adierazi du, jendeak sorterria zaintzeko interesa duelako. Ildo horretatik, Galipentzuren zoladurak harritu du, "harriz harri egindako lana" baita, eta auzokoek ingurua edertzeko ahalegina egin baitute.

Galipentzuren hirigune historikoan kaleen zoladura hobetu da, 307.603 euro inguruko inbertsioa eginda. Toki Administrazio Departamentuak gutxi gorabehera 202.958 euro eman ditu. Herri horretako hirigunea zaintzen interes berezia jarri da, Nafarroako erresuma zaharraren talaietako bat izan baitzen.

Jarduna Erriberriko Erri-Berri, SL enpresak egin du, eta proiektuaren idazketa eta lanen zuzendaritza Yako Ingenieros, SL enpresaren esku egon da.

Galipentzun orain egindako hobekuntzak, alde zaharrean zein berrian, aurretik egindako beste batzuei gehitu behar zaizkie. Orduan 68.877 euro inbertitu ziren, eta Toki Administrazio Departamentuak 44.215 euro eman zituen. Lan horietan hormak konpondu ziren eta ekaitzek jotako kaleetan zoladura jarri zen.