Begoña Sanzberro Iturriria Landa Garapeneko eta Ingurumeneko kontseilaria 2010-2014 aldiari dagokion Landa Garapen Jasangarriko Programaren (www.pdrs.navarra.es) aplikazioari buruzko informazio-saio baten burua izan da gaur goizean. Informazio-saioa Programan ezarritako laguntzak jasoko dituzten Foru Komunitateko lau landa-inguruetako agente instituzional eta sozioekonomikoei bideratuta egon da.

Landa Garapen Jasangarriko Programa Nafarroak eta Estatuak %50ean finantzatzen dute, eta Programa indarrean dagoen lau urteetarako esleitutako funtsak 34,6 milioi eurokoak dira (17,3 milioi euro administrazio bakoitzak).

Hona hemen Programan ezarritako esku-hartzeen jomuga izango diren lau inguruak: Pirinioak, Mendi Atlantikoak, Lizarrako Mendia eta Erdialdeko-Ekialdeko Nafarroako mendilerroak. Inguru horiek foru-lurraldearen %40,15 eta 127 udalerri barruan hartzen dituzte, hau da, Nafarroako biztanleen %6. Lurralde horrek Natura 2000 Sarearen inguruaren ia erdia hartzen du eta, beraz, balio ekologiko handia du. Inguru horietan biztanleria etengabe jaisten ari da, eta Nafarroako gainerako inguruetan adierazle horrek gora egin du azken urteetan.

Informazio-ekitaldian, Sanzberro kontseilariak alboan izan du Eduardo Tamarit Pradas Ingurumen, Landa eta Itsas Inguruaren Ministerioko Landa Inguruaren idazkari nagusia. Presidentzia-mahaian Jesús Casas eta Jesús María Echeverría Ministerioko eta Nafarroako Gobernuko Landa Garapeneko zuzendari nagusiak egon dira.

Epe laburrean, Nafarroako Gobernuak Programako jardunak formalizatzen dituen hitzarmena sinatuko du Estatuarekin (Espainian hori egiten duen lehenengo autonomia-erkidegoetakoa izango da), eta urte honetan bertan Nafarroako Gobernuak jardunak abiatuko ditu. Nafarroako Gobernuak xede horretarako 1.896.000 euroko aurrekontu-partida du 2011n. Estatuaren jardunak 2012an hasiko dira.

Hona hemen Programa indarrean dagoen lau urteetan funtsek izango duten banaketa: Pirinioak, 12,35 milioi (%35,70); Mendi Atlantikoak, 7,45 milioi (%21,54); Lizarrako Mendia, 8,69 milioi (%25,12) eta Erdialdeko-Ekialdeko Nafarroako mendilerroak, 6,1 milioi (%17,64).