Nafarroako Gobernuak, Berrikuntza, Enpresa eta Lan Departamentuaren bidez, 14.800 euro bideratuko ditu Sakanako Berrikuntza Mapa egitera. Jardun horren abiapuntua joan den urrian Nafarroako Berrikuntza Agentziak (ANAIN), Foru Gobernuari atxikitako sozietate publikoak, eta Sakanako Enpresaburuen Elkarteak (SEE) Nafarroako III. Plan Teknologikoaren barruan sinatutako hitzarmena da.

SEErekin egindako jardun hau 2005. urtearen amaieran hasitako lan-ildoari dagokio. Hain zuzen ere, orduko hartan Nafarroako enpresa-elkarteekin plan teknologikoaren eta I+G+b-ri lotutako beste plan batzuen inguruko informazioa eta banakako aginduak ematen hasi ziren. Urte hauetan enpresa-elkarte horietako 10 lankidetzan aritu dira (sektorekoak/gremiokoak zein zonakoak –horixe da SEEren kasua-), eta 580 enpresa inguru bisitatu dira.

José María Roig Aldasoro Berrikuntza, Enpresa eta Lan kontseilariak nabarmendu du proiektu hau oso garrantzitsua dela eskualdeko ehun ekonomikorako. Roigen eta Francisco López de Alda SEEko lehendakariaren esanetan, ezinbestekoa da enpresek berrikuntzaren aldeko etengabeko apustua egitea, produktibitate eta lehiaortasun mailak handitzeko. Aurreikuspenen arabera, Sakanako Berrikuntza Mapa urteko bigarren hiruhilekoan amaituta egongo da.

Nafarroako Gobernuaren eta SEEren baterako ekimenak helburu bikoitza du: batetik, Sakana inguruan berrikuntzaren azterketa orokorra egitea (berrikuntza mapa). Inguruko enpresen beharrizanen, egonezinen, eskaeren, aukeren, eta abarren diagnosia egin eta lehentasunak ezarriko dira. Hori guztia SEEk inguru horretarako berrikuntza jarduerako proiektuak ezartzeko oinarria izango da.

Bestetik, berrikuntzari buruz eta Nafarroan (kasu honetan, Nafarroako hirugarren Plan Teknologikoaren bidez, 2008-2011), Espainian eta Europan enpresen aldetik I+G+b proiektuak egiteko eskaintzen diren programei eta aukerei buruz informazioa eta orientazioa emango dira.

Helburu horiek SEErekin aurretik adostutako 30 enpresara bisita indibidualizatuak eginda beteko dira. Elkarte horren arabera, eta SEE-ANAIN lankidetza-hitzarmenean ezarritakoaren ildotik, enpresa horiek hainbat arrazoi direla bide nabarmentzen dira: horietan Sakanako langileen %44k lan egiten du; horietan nekazaritzako elikagaien sektorea, eraikuntza, zura, metalurgia, kimika eta zerbitzuak/besteak sektoreak ordezkatuta daude; eta guztiak Sakanako errealitatearen adierazgarriak dira (bai neurriari begira –handiak edo ETEak-, bai sektore bakoitzeko langileen kopuru osoari dagokionez).

Esaterako, 30 enpresako multzo horretan ordezkaritzarik handiena duen sektorea metalurgikoa da: 15 enpresa daude eta, guztira, 1.304 langile dituzte. Jarraian, eraikuntzako 6 enpresa daude, 386 langilekoak, eta zerbitzuen sektorea 4 enpresarekin eta 298 langilerekin. Horrez gain, zurarekin lan egiten duten 2 enpresa eta nekazaritzako elikagaien sektoreko beste bi daude (191 langile guztira, 131 eta 60, hurrenez hurren), eta sektore kimikoko enpresa adierazgarri bat, 40 langilekoa.

Gaur egun, Sakanako Enpresaburuen Elkartea 152 enpresak babesten dute, hau da, 4.000 langilek baino gehiagok. Eskualdeko industria-ehunaren %80tik gora hartzen du.