Isabel García Malo Familia, Gazteria, Kirol eta Gizarte Gaietako kontseilariak, Iruñeko Kondestablearen Jauregian, "emakumeen aurkako indarkerian arretaren eta prebentzioaren koordinazio eraginkorrerako Erakunde Arteko Akordioa" aurkezteko jardunaldia egin du gaur goizean. Akordio hori joan den abenduaren 17an sinatu zuten Nafarroako Gobernuak, Gobernuaren Nafarroako ordezkaritzak, Botere Judizialaren Kontseilu Nagusiak, Iruñeko Fiskaltza Nagusiak eta Nafarroako Udal eta Kontzejuen Federazioak.

Ekitaldi horretan, García Malo kontseilariak alboan izan ditu Juan Manuel Fernández Martínez Nafarroako Auzitegi Nagusiko lehendakaria, Francisco Javier Muñoz Cuesta Nafarroako Fiskal Nagusia, Sara Ibarrola Intxusta Nafarroako Berdintasun Institutuko zuzendari kudeatzailea eta Amelia Valcárcel filosofo eta idazlea.

Erakunde Arteko Akordio horren helburuak dira emakumeen aurkako indarkeriaren prebentzioan esku hartzen duten erakundeen artean koordinaziorik onena lortzea eta biktimei laguntzea. Era berean, jarduera ildo homogeneoak ezarri nahi dira Foru Komunitate osoan, osasun eta polizia arloetan eta arlo judizial eta sozialean kalitatezko artapena bermatzeko. Horrekin batera, prebentzio eginkizuna egiteko konpromisoa dago, hezkuntza eta sentsibilizazio neurrien bidez.

2010ean Nafarroan 1.210 salaketa egon ziren emakumeen aurkako indarkeria egintzengatik (aurreko urtean baino %7,9 gutxiago). Horietatik %5,73 salatzailearen gaur egungo bikoteari dagozkio, eta %34,3 bikote ohiari. Jaioterriari erreparatuz, erasoak jasan zituztenen %52 espainiarrak ziren, eta %48 hirugarren herrialdeetakoak. Iruñean eta Iruñerrian egiten da salaketa kopuru handiena (%67,68).

García Malo kontseilariak hitzaldian Akordioaren hiru alderdi nabarmendu ditu. Lehenengo eta behin, indarkeria matxista errotik erauzteko erakundeen arteko koordinazioa beharrezkoa dela adierazi du. Jarraian, delitu horiek oso larriak direla nabarmendu du, eta Amelia Valcárcel idazlearen hitzak erabiliz, hurrengoa esan du: "emakumeak irabazleak dira indize zalantzati baten inguruan, hain zuzen ere, indarkeriaren indize oso handia jasaten dute, aldatu ezin duten arrazoi bategatik: emakumeak direlako". Eta, amaitzeko, Nafarroako Gobernuko Gizarte Gaietako Departamentuaren titularrak gogorarazi duenez, "berdintasunean trebatzea ezinbesteko erronka da esku hartzeari begira".

Erakunde Arteko Akordio hau sinatzen den bigarrena da eta 2002tik indarrean zegoena ordezten du. Hain zuzen ere, Akordio hau indarkeria matxistaren eta biktimen arretaren arloan lege eta administrazio esparruan izandako aldaketetara egokitu da. 2002. urtearen ostean, lege eta arau berriak aldarrikatu dira, Estatuan zein Foru Komunitatean, kasu hauei aplikatzeko modukoak. Lehenengo Akordioa sinatu zuten erakundeen aldetik sektoreko akordioak, hitzarmenak eta protokoloak sinatu dira, eta horiei esker erakundeen artean koordinazio hobea lortu da. Horrez gain, Nafarroako Emakumeen eta Gizonen Aukera Berdintasunerako I. Plana onetsi da 2006-2010 aldirako. Aurrerapen horiek gaur goizean Iruñean aurkeztutako bigarren Erakunde Arteko Akordioaren oinarriak izan dira.