Urtero haur minbiziaren 15 kasu inguru diagnostikatzen dira Nafarroan, eta biziraupen tasa %80 ingurukoa da. Minbiziaren aurkako egunean egindako ‘Gosari osasuntsuen’ edizio berri batean emandako datuetako batzuk dira. Saio horretan María Kutz Osasun kontseilariak parte hartu du, eta bere esanetan, "patologia hori, gaur egun, kasuen ehuneko handi batean gainditzen da eta aldi baterako izaten da". Horrez gain, María Sagaseta de Ilúrdoz NOGeko haur onkologoak, Nafarroako Klinika Unibertsitarioko Pediatria zuzendariak, Laura Sanz neska gaixo baten amak eta Marta Zalacáin eta Verónica Machado gaixotasun hori haurtzaroan gainditu zutenek parte hartu dute.

Sagaseta doktoreak azpimarratu duenez, garrantzitsua da haurrarentzat hain agresiboak ez diren tratamenduak bilatzea. Gainera, adingabeak prozesu guztiari buruzko informazioa izan behar du. Bestalde, Sierrasesúmaga doktoreak nabarmendu duenez, "Nafarroa erreferentzia da laguntzari, ikerketari eta irakaskuntzari dagokienez"

Nafarroako Minbizi Erregistroko datuen arabera, Foru Komunitatean urtean 15 minbizi kasu inguru diagnostikatzen dira 15 urtetik beherakoen artean. Espainia osoan, 900 eta 950 kasu bitartean izaten dira. Adin taldeei erreparatuz, tasarik handiena urtebetetik beherakoen artean dago. Oro har, tumore gehienen kasuan, intzidentzia tasak antzekoak dira Espainian eta Europan. Kasu kopurua txikia denez, zaila da autonomia-erkidegoen arabera konparazioak egitea.

Mota desberdinei erreparatuz gero, leuzemiak dira gaixotasun ohikoenak haurren artean, eta bigarren eta hirugarren lekuan nerbio sistema zentraleko tumoreak eta linfomak aipatu behar dira.

Bestalde, minbizia duten haurren biziraupenak gora egin du, eta gaur egun %80 ingurukoa da. 1999-2002 aldian, 5 urterekin biziraupena %77koa izan zen tumore mota guztiei dagokienez. 80ko hamarkadan %54 zen, eta 90eko hamarkadaren hasieran, %70. Gorakada hori faktore askoren emaitza da, besteak beste, aurrerapenak diagnosian eta tratamenduan, haur patologia horren artapena minbizi pediatrikoaren unitateetan pilatzea eta tratamendu protokoloetan apurka-apurka eta lankidetzan parte hartzea.