Foru Komunitatea "Nafarroa-Estatu Batuak Astea 2011" ekitaldian ordezkatzen duen ordezkaritzak lehenengo laneguna izan zuen Washingtonen. Juan Verde Barak Obamaren Administrazioko Merkataritzako Estatu idazkariordearekin bilera izan zuen, eta topaketa horretan Jorge Dezcállar Espainiak Ipar Amerikan duen enbaxadoreak ere parte hartu zuen.

Miguel Sanz Nafarroako Lehendakariak, Álvaro Miranda bigarren presidenteordeak eta Ekonomia eta Ogasun kontseilariak, José Antonio Sarría Nafarroako Enpresaburuen Konfederazioko lehendakariak, Javier Taberna Merkataritza eta Industria Ganberako lehendakariak, José Javier Armendáriz CENEReko zuzendari nagusiak eta Benito Jiménez enpresaburuak Nafarroako ekonomiaren ezaugarriak azaldu zituzten, Moderna Plana eta energia berriztagarriak bultzatzeko eredua bereziki azpimarratuz.

Juan Verdek interes handia erakutsi zuen Nafarroak egindako etorkizuneko apustuengatik eta Estatu Batuetako eta Nafarroako inbertsiogileek enpresa-jardueretan aukerak aurkituko dituztela adierazi zuen. Ipar Amerikako Merkataritzako Estatu idazkariordea harrituta agertu zen Nafarroak biomedikuntzaren, bioteknologiaren eta nekazaritzako elikagaien arloan dituen datu bikainak ikusita. Foru Komunitateak Europako eskualdeen artean lidergo handia duela eta Nafarroako eta Espainiako langabezia-tasen artean dagoen aldea ere aztertu zuen.

Espainiak Estatu Batuetan duen enbaxadoreak goretsi egin zituen zazpi urte hauetan Nafarroako Gobernuak, Merkataritza eta Industria Ganberaren, SODENAren eta Ardoaren Jatorri-deituraren Kontseilu Arautzailearen bitartez garatu dituen misio instituzionalak. Jorge Dezcállar-ek Nafarroako Foru Komunitateari Espainiaren hurrengo jaia eskaintzea proposatu zion, urriaren 12an, Washingtonen. Ekitaldi horrek tradizio handia du Estatu Batuetan eta administrazio federaleko eta ordezkaritza diplomatikoetako mila bat goi-kargudun biltzen ditu.