‘Energiaren Foroko’ eta ‘Energia Jasangarrien Taldeko’ kideak New York Times-en ekitaldien aretoan bildu ziren atzo, Manhattan uharteko 41. kalean. Guztiek harrituta entzun zuten Miguel Sanz Nafarroako Lehendakaria esaten 2009. urtean Foru Komunitateak beharrizan elektrikoen %81i baino gehiagori energia garbien bidez erantzun ziela.

2009. urtean foro berean egin zuen moduan, Sanz Lehendakariak Nafarroa energia berriztagarrien sektorean munduko lider moduan ezartzen duten datuak aurkeztu zituen, eta "egia bihurtutako ametsa" den egoera hori lortu arte emandako pausoak azaldu zituen.

Miguel Sanzek hitzaldi ia osoa etorkizunera begiratzeko erabili zuen eta Nafarroak aurrerantzean "energiaren kudeaketa adimentsuaren" aldeko apustu erabakigarria egingo duela iragarri zuen. Lehendakariaren esanetan, kudeaketa horretan "elektrizitatea mikrosareen bidez banatu behar da, eta horri esker, energia sortzeko puntuak kontsumitzaileengana hurbilduko dira, gaur egun izaten dituzten galerak murriztuz".

Horrez gain, Nafarroako Lehendakariak aurrezteko plan integralak egitea defendatu zuen "herritar guztien gizarte maila guztiak eta eguneroko bizimoduko jarduera guztiak barne hartuta", eta Nafarroako Plan Energetiko berria "eskualdeen dinamismoa eta lehiakortasuna bultzatzen duten jomuga arranditsuetako bat" dela esan zuen.

Ekitaldia New York Times-en egoitzan egin zen. Horren bidez, Ipar Amerikako espezialistek Energia Berriztagarrien Zentro Nazionala hobeto ezagutu zuten, José Javier Armendárizen eskutik, baita Gamesa ere, Luis Miguel Fernández Estatu Batuetako ordezkariaren eskutik.

‘Nasdaq’ saioaren irekitze ekitaldia

Nafarroaren Estatu Batuetako 7. Astean parte hartzen duen ordezkaritza instituzionalak atzoko eguna Times Squaren hasi zuen, eta minutu batzuetan pantaila erraldoi eta ikusgarrietako protagonista izan zen.

Javier Taberna Nafarroako Merkataritza eta Industria Ganberako lehendakariak Estatu Batuetako balioen burtsa elektroniko automatizaturik garrantzitsuenaren saioa irekitzeko ohorea izan zuen. Burtsa horretan 3.800 konpainiak kotizatzen dute, horietako asko teknologia berrien sektorekoak, eta eguneran sei bilioi transakzio egiteko gai da.

Saioa irekitzeko hitzaldian, Tabernaren esanetan, Nafarroako Gobernuak zein Foru Komunitateko enpresek "apustu erabakigarria egin dute teknologia berrien alde, bioteknologiaren alde eta, batez ere, klima-aldaketaren aurka borroka egiten duten arloen alde". Merkataritza Ganberako lehendakariak, hitzaldia amaitzeko, Nafarroako enpresa guztiak Ipar Amerikako merkatua arakatzera bultzatu zituen, eta amerikar enpresaburuei Espainiarekiko lankidetzan dagoen potentzial handia aurkitzeko gonbita egin zien.

Atzoko eguna osatzeko, Nafarroako ordezkaritzak IESE Nafarroako Unibertsitateko negozioen eskolak New Yorken duen egoitzara bisita egin zuen, iaz 57. kalean ireki zutena. Era berean, Sanz Lehendakariak, Álvaro Miranda bigarren presidenteordeak eta Ekonomia eta Ogasun kontseilariak, Javier Tabernak eta José Antonio Sarría CENeko lehendakariak topaketa izan zuten Ipar Amerikako inbertsio funts garrantzitsuen ordezkariekin, hala nola, Joseph Oughourlian ‘Amber Capital’ izenekoaren kontseilari delegatu eta jabekidearekin eta Angel de la Fuente ‘Kepler Capital Markets’ funtseko ordezkariarekin.