Nafarroako Gobernuak Foru Komunitateko suhiltzaile boluntarioen sareari eusteko Agoitz, Bera, Goizueta, Leitza, Lesaka eta Luzaideko udalekin eginda dituen hitzarmenak berritu ditu gaur. Laster Izabako Udalarekin beste horrenbeste egingo du, herri horrek ere boluntarioen egitura horretan parte hartzen baitu. Egitura 145 efektibok osatzen dute eta Nafarroako Larrialdi Agentziarekin modu egonkorrean lankidetzan aritzen dira basoko eta hiriko suak itzaltzen, galtzadak garbitzen, zuhaitzak kentzen, pertsonak bilatzen, erreskateetan, anbulantziako joan-etorrietan eta parkeak mantentzen.

Javier Caballero lehen presidenteordea eta Lehendakaritza, Justizia eta Barne kontseilaria sei hitzarmen sinatzeko ekitaldiaren buru izan da Nafarroako Jauregiko jan-egongelan. David Sáinz Nafrroako Larrialdi Agentziako zuzendari kudeatzaileak akordioak sinatu ditu, baita ere Agoitzeko alkateak (Francisco José Enguita), Berakoak (José Iratzoki), Goizuetakoak (Mikel Joxe Lekuona), Leitzakoak (Javier Zabalo), Lesakakoak (Juan Fermín Mitxelena) eta Luzaidekoak (Fernando Alzón).

Caballero presidenteordeak boluntarioen ekipo horien profesionaltasuna nabarmendu du. "Berezko eskubidez Nafarroako babes zibileko sistema" osatzen dute eta sistema horren lan-metodologiak definitzeko pieza giltzarria dira.

Gaur sinatutako hitzarmenek urtebeteko indarraldia dute eta beste hiru urtez luzatu daitezke. Foru Gobernuaren ustez, suhiltzaile boluntarioek "funtsezko eginkizuna" gauzatzen dute Nafarroako babes zibileko sistemaren barruan, eta horregatik, akordio hauek berritu behar dira. Hitzarmenean azpimarratutakoaren arabera, horiei esker "herritarrei zerbitzu hobea eskaini ahal izan zaie" eta Altsasu, Auritz, Cordovilla, Lizarra, Lodosa, Nabaskoze, Oronoz, Iruñea, Azkoien, Zangoza, Tafalla eta Tuterako suhiltzaile profesionalen parkeen eginkizuna barruti estrategikoetan osatu ahal izan da.

Joan den urtarrilaren 31n, Nafarroako Gobernuak NLAko zuzendari kudeatzaileari 2011n 356.000 eurora arteko diru-laguntza zuzenak emateko baimena eman zion, modu honetan banatuta: 160.000 eurora arteko zenbatekoa gastu arruntetarako, eta 196.000 inbertsioetarako.

Azken lau urteetan, Nafarroako suhiltzaile boluntarioen sarea osatzen duten zazpi ekipoek 1.703 esku-hartze egin dituzte (urte eta parke bakoitzeko praktiketako 10 jarduera barruan hartuta). Horretan ia-ia 30.000 ordu inbertitu dituzte eta 8.300 parte-hartzaile izan dituzte. Iaz, Izabako suhiltzaileen ekipora hamabi efektibo gehitu ziren, suak itzaltzeko, erreskateko eta larrialdiko laguntzarako beste maniobra batzuei buruzko prestakuntza-ikastaro bat egin eta gero.