2010eko Etxepare Saria Leire Salaberriaren "Euria ari duenean" lanak irabazi du. Haurrentzako album horrek testuak eta irudiak biltzen ditu. Saria 6.000 eurokoa da, egile-eskubideen aurrerapen moduan, eta gainera, lana argitaratuko da, Pamiela etxearen eskutik.

Epaimahaiak Gipuzkoako artistari (Andoain, 1983) buruz esan duenez, "eguneroko gauzak begirada desberdinarekin aztertzen ditu" eta "gure inguruko ohiko osagaiei –hala nola euria, euritakoa, mendiak, etxeak- ukitu magikoa gehitzen die, errealitatearen alderdi poetikoa azpimarratuz".

Era berean, epaimahaiaren esanetan, koloreen sortak "euri-egunen argi urriari etekina ateratzen dio". Horrez gain, irudien konposizioan "erakutsitako oreka eta originaltasuna" eta "testuaren lirismo iradokigarria" direla bide, lan honek Etxepare Saria jaso du.

Epaimahaiaren erabakia Berriozarreko Udalean egindako ekitaldian jakinarazi dute gaur. Ekitaldian Xabier Azanza Euskararen Nafar Institutuko zuzendari kudeatzaileak, Gotzone Saiz de Murieta eta Gorka Iriarte Arakil eta Arbizuko Udaletako zinegotziek, Iñaki Agirrezabal eta Jon Zabaleta epamahaiko kideek, Leire Salaberria sariaren irabazleak eta Pello Elzaburu Pamiela argitaletxeko ordezkariak parte hartu dute.

Ekitaldi horretan

Etxepare Saria Barañain, Baztan, Berriobeiti, Berriozar, Burlata, Lizarra, Uharte, Gares eta Zizur Nagusiko Udalek antolatzen dute, baita Bortizietako eta Nafarroa iparraldeko euskara mankomunitateek, Malerreka eta Sakana mankomunitateek eta Erronkari eta Zaraitzuko batzar nagusiek ere. Nafarroako Gobernua, Euskararen Nafar Institutuaren bidez, lankidetzan aritzen da toki entitateekin sinatutako lankidetza-hitzarmenaren barruan udal esparruan euskararen erabilera normalizatzeko. Horretarako 7.000 euro ematen ditu.