Hamar gomendio

Pazienteen kasuan, sintoma jakin batzuk izanez gero medikuari edo pediatrari zuzenean antibiotikoak ez eskatzea gomendatu du, medikuak eta pediatrak beraiek baitira kasu bakoitzaren balorazio egokia egin behar dutenak eta gaixoek benetan noiz behar dituzten dakitenak.

Medikuaren errezetarik gabe ere antibiotikorik ez hartzea gomendatu du, baita medikuek dosien inguruan ezarritakoa, botika hartzeko modua eta tratamenduaren iraupena zehatz betetzea eta botika-kutxan antibiotikoen hondarrik ez gordetzea ere. "Tratamendua amaitu ondoren, farmaziara eraman birziklatzeko", gomendatu du.

Horrez gain, gogorarazi du ez dela komenigarria herritarrek tratamendu antibiotikoak ezagunei gomendatzea edo farmazialariari eskatzea, "medikuak bakarrik agindu ditzakeelako" eta egokiena aukeratu.

Osasun langileen kasuan, aldiz, Ezpeletak zera gomendatu du: "Antibiotiko bat hartzeko agindu aurretik, beharrezkoa den ala ez pentsatzea", "prozesu sukartsu guztiek ez dutelako behar" tratamendu hori. "Birusengatiko infekzio bat, edo hotzeria soil bat ez dira lehenago sendatuko edo ez dira konplexutasunak izatetik saihestuko antibiotiko bat hartzeagatik", gogorarazi du.

Halaber, azaldu du, antibiotiko bat ematea beharrezkoa izanez gero, "hasi aurretik lagin bat hartu behar dela hazkuntzarako eta antibiogramarako", "tratamendurik egokiena eta espezifikoena hartzeko agindu ahal izateko". Emaitza lortu bitartean, sindrome infekziosoaren inguruko esperientzian, pazientearen ezaugarrietan eta gure inguruko erresistentzia ereduetan oinarrituriko tratamendu bat aukeratuko da.

Orduan, hazkuntzaren analisiaren emaitza lortzean, tratamendu antibiotikoa pazientearen bilakaeraren arabera egokituko da eta tratamendu enpirikoa baino espektro txikiagoko antibiotikoa erabiltzeko aukera proposatuko da. Horri deseskalazioa esaten zaio. Ezpeletak azpimarratu du beti kontuan izango direla "antibiotikoaren ezaugarri farmakozinetikoak eta farmakodinamikoak eraginkortasunik handiena lortzeko".

OMEren deia

OMEk Osasunaren Nazioarteko Eguna baliatu du antibiotikoen kontsumo arduratsuaren kanpaina sustatzeko. Botika horiekiko erresistenteak diren mikroorganismoen hedapena izaten ari den eragina kezkatzekoa da.

Azken 70 urteetan antibiotikoak gaixotasun infekziosoak tratatzeko erabili dira, onura ikaragarriak ekarri dituzte eta milioika bizitza salbatu. Hala ere, bakteriek botika horiekiko duten erresistentzia areagotuz doa hainbat faktore medio, besteak beste, nork bere kabuz sendagaiak hartzen dituzten pazienteen erabilera arduragabea, botikak neurriz kanpo hartzea edo behar ez bezala erabiltzea (antibiotikoen tratamendua hasi ondoren ez amaitzea edo behar ez direnean hartzea) edo animalien elikagaietan erabiltzea. Horiek ere mikroorganismo erresistenteak sortzen ere laguntzen dute neurri handi batean.

Bakterien erresistentzia mundu osoan ematen da, ez bakarrik herrialde garatuetan. Egiaztatu da bakteria erresistenteez kutsaturiko pazienteek gaixoaldi luzeagoak izaten dituztela eta infekzio baten ondorioz hiltzeko aukera handiagoa dutela. Gainera, antibiotikoak funtzionatzen ez duenean, bigarren eta hirugarren mailako farmakoen tratamendua behar izaten da. Horiek ez dira hain eraginkorrak izaten, toxikoagoak izaten dira, pazienteak albo-ondorio gehiago pairatzen ditu eta osasun sistementzat garestiagoak dira.

Antimikrobianoekiko erresistentzia eta horiek munduan zehar zabaltzea gaur egun erabiltzen diren botika askoren eraginkortasunaren jarraipenarentzako mehatxua dira eta, gainera, infekzio hilgarri garrantzitsu batzuen aurka lortzen ari diren aurrerapen handiak arriskuan jar ditzakete. Gaur egun, antimikrobianoekiko erresistentzia munduko osasun publikoaren arazorik larrienetako bat da. Gaixotasun infekziosoak eragiten dituzten mikrobio askori (bakteriak, birusak, protozooak) ez die eraginik egiten erabilera arrunteko antimikrobianoek (antibakterianoak, antibiotikoak, antibirikoak eta antiprotozoarioak).

Arazoa larria da, eta adituen ustez, mundu osoan jokatu ezean, antibiotikoen aurreko garaira itzultzeko arriskua dago. Garai hartan hainbat pertsona hil ziren gaixotasun infekziosoen ondorioz eta kirurgia ebakuntzak ere ezin zitezkeen egin infektatzeko zegoen arriskuagatik. Antimikrobianoekiko erresistentzia agertzea fenomeno naturala da, antimikrobianoak erabiltzearen ondorioa da; hala ere, abiadura azkarrean ari da zabaltzen botikak behar ez den bezala erabiltzen direlako.