Nafarroako Gobernuko Hezkuntza Departamentuak Conchi Aguirre Iruñeko Arte Eskolako Eskulturaren Arte Aplikatuen goi-graduko bigarren mailako ikaslearen lan bat erosi du. Lana burdina forjatuz eskuz egindako pauma da, eta Departamentuaren egoitzaren sarreran jarri dute.

Alberto Catalán Hezkuntza eta Erakundeekiko Harremanetarako kontseilariak eta Gobernuaren eledunak lanaren egilea eta Rosa García Herrero Arte Eskolako zuzendaria hartu ditu gaur, eta hirurek eskulturak hartzen duen espazioa bisitatu dute. Lana egiteko, egileak prozesu garaikideak eta tradizionalak konbinatu nahi izan ditu, hala nola plasmarekin moztea eta soldatzea, burdinaren sutegia beroan eta ingudean lan egitea.

Conchi Aguirrek lan honen diseinua metalaren teknikak moduluaren barruko ariketa moduan hasi zuen. Egilearen esanetan, "forma irekiko" irudia egin nahi izan du, eta "eskulturaren sintetizazioa forma ahurrak eta ganbilak erabiliz lortzea". Xede nagusia "identifikatzeko moduko irudia, orekatua eta harmoniatsua" egitea izan da.

Iruñeko Arte Eskolan, gaur egun, ikasketa hauek eskaintzen dira: Autoedizioko eta Aroztegi Artistikoaren erdi-mailako graduko bi ziklo, 31 eta 16 ikaslerekin hurrenez hurren, Eskulturaren Arte Aplikatuen goi-mailako graduko lau ziklo (17 ikasle), Argazkigintza Artistikoa (37 ikasle), Grabatua eta Estanpazio Teknikak (16 ikasle) eta Apainketa-lanen proiektuak eta zuzendaritza (48 ikasle). Guztira, zentroan aurten 360 ikasle daude, Arteen Batxilergoko ikasleak, erdi-mailako eta goi-mailako graduetakoak eta Hasierako Lanbide Kualifikazioko Programa Berezikoak.