Nafarroako Immigrazioaren Behatoki Iraunkorrak azpimarratu du egoera ekonomikoak nabarmen okertu duela etorkinen laneko egoera azken biurtekoan. Langabezian dauden eta lana bilatzen ari direnen portzentajea 2008an % 20 izatetik 2010ean % 30,2 izatera pasatu da; horrekin batera, lan baldintzek ere okerrera egin dute. Hortaz, kalifikaziorik behar ez den lanpostua duten etorkinen portzentajea 2008an % 44,8 izatetik 2010ean % 54,1 izatera pasatu da.

Bost eguneko lanek ere % 17 egin dute behera eta lau egun edo gutxiagokoek, aldiz, gora. Hori dela eta, lanpostu irregularrenak edo pilatzen direnak ugaritu dira. Astelehenetik ostiralerako lan astearen ordez, egun gutxiagotako lanpostuetan jardun dira edo krisiaren ondorioei aurre egiteko lan osagarriak bilatu dituzte.  Hori hala izanik, bigarren lanpostua dutenen portzentajea 2008an % 3,6 izatetik 2010ean % 14,4 izatera pasatu da.

Halere, etorkinek lan merkatura berregokitzeko duten gaitasuna azpimarratu du; % 33,8k beste lanpostu bat bilatzea lortu du krisia larriagotu aurretik zeukatena galdu arren.

Gizonezkoenak bihurtu diren jardueretako langabezia handiagoa denez, gizonen eta emakumeen arteko lan egoeran bereizketa egon da. Inkestari erantzun dioten emakumeen langabezia tasa txikiagoa izan da eta gizonek baino lanpostu gutxiago galdu dituzte. Hala eta guztiz ere, emakumezkoek hainbat lanpostu izateko joera dute, asteko egun gehiagotan egiten dute lan eta gizonezkoek baino lan baldintza okerragoetan: lanean ari diren emakumeen % 15,2k ez du kontraturik; gizonen kasuan, aldiz, % 7,1 dira kontraturik gabekoak.

Etxearekin zerikusia duten zorrak hamar aldiz ugaritu dira

Azterlanaren arabera, halaber, etorkinen osasun egoerak okerrera egin du, horren ondorioz, osasun baliabideetara gehiago jotzen dute, nahiz eta bertako biztanleen aldean neurri txikiagoan. 2008ko egoerarekin alderatuta, % 23 egin du behera haien egoera "ona edo oso ona" dela esan duten etorkinen portzentajeak; % 65 dira egoera horretan bizi direnak orain.

Krisiak mota guztietako patologiak eta horien ondoriozko kontsulta medikoak ugaritu ditu, batez ere lan eta gizarte baldintza ahulenak dituztenentzat.  Osasun zentroa etorkinek gehien erabiltzen duten zerbitzua da.

Etxebizitzari dagokionez, 2010ean, biztanle etorkin guztien % 64,9k etxebizitza errentan hartua zuen (% 52,6k etxebizitza osoa hartu zuen errentan eta % 12,5ek logela bat). Etxearekin loturiko zorrak areagotu izana nabarmena da, izan ere, 2008tik hamar aldiz ugaritu dira. Gauzak horrela, ia bi etorkinetatik batek gaur egun mota horretako zorrak ditu. Horrez gain, hipoteken gastuak gora egin du, hainbat banku eta kutxak maileguak emateari uko egin dio eta etorkinek lanpostuak galdu dituzte; horren guztiaren ondorioz, etorkinen % 5,4k jabetzan zuen edo etorkizunean eros zezakeen etxebizitza galdu du.

Diskriminazio etnikoa, gizartea elkartzearen oztopoa

Inkestan parte hartu duten etorkinen ia % 40k aitortu du etorkinak izateagatik beste modu batera tratatzen dituztela sentitzen dutela. Lanean (% 24), establezimendu publikoetan (% 21) eta kalean (% 20,1) nabaritzen dute gehien bazterketa hori.  Oro har, Latinoamerikako etorkinak eta Afrika iparraldekoak baztertuago sentitzen dira ia alor guztietan; Europar Batasunekoek, aldiz, onartuagoak direnaren ustea dute.

Etorkinen % 38,5ek etorkinei harrera egin eta gizarteratzen laguntzen dieten gizarte ekimeneko erakundeetara jo du eta % 24,1ek oinarrizko gizarte zerbitzuak baliatu ditu.  Harrera egiteko baliabideen erabilera pixkanaka behera egiten ari da eta Nafarroako Immigrazioaren Behatoki Iraunkorraren ustez, horren arrazoia etorkinak heldueraren ondorengo faseetan daudelako da, baita laguntzeko sare informalak areagotu direlako ere (% 10,9k esan duenez, jatorriko herrialdeko familiak diruz laguntzen die).

Afrika iparraldetik datozenak dira kalteberenak

2010ko inkestaren arabera, inkestan parte hartu duten Afrika iparraldeko etorkinek krisiaren eraginak modurik gogorrenean pairatzen dituzte aztertutako parametro guztietan. Egoera horren aurkakoa bizi dutenak Europar Batasuneko beste herrialde batzuetakoak dira eta, alorraren arabera, espainiar herritartasuna lortu dutenak.

Langabezia handiena etorkin magrebtarren artean eman da, gehienbat eraikuntzaren sektorean jarduten direlako. Lanpostutik gehien galdu duen taldea da (% 53,2), baita 2008tik etxebizitza gehien aldatu behar izan duena (% 48,4) edo jabetzan zuen edo etorkizunean eros zezakeen etxebizitza galdu duena ere (% 12,9).