Azterlanaren arabera, aztertutako zortzi eskualdeen puntu erkidea langabeziaren gorakada da, baina inguru batzuetan profesional kualifikatuak falta dira. Horretarako, txostenean etorkizunerako zenbait proposamen gehitu dira, "Brain Flow" partzuergoko kide diren eskualde guztiek talentua erakartzeko gaitasuna hobetu dezaten. Modu horretan, eskualde arloan analisi bat egitea planteatzen da, toki ekonomiaren beharrizanak identifikatzeko eta beharrizan horiekin bat datozen prestakuntza- eta enplegu-programak sortzeko. Era berean, Europako programak eta funtsak erabiltzea proposatzen da (adibidez, Lifelong learning), herritarrei beharrezko prestakuntza lortzen laguntzeko.

Iruñean egindako bileran, Nafarroak toki ekonomiarako giltzarriak diren sektoreen barruan talentua erakarri eta kudeatzeko duen esperientzia azaldu zen. Modu horretan, Nafarroako Enplegu Zerbitzuak bultzatu eta AINek eta Humanek esparru horretan egindako zenbait azterlan aurkeztu ziren. Programa osatzeko, Energia Berriztagarrien Zentro Nazionalera eta Medikuntza Aplikatuaren Ikerketa Nazionalera bisitak egin ziren. Bisitariek Nafarroan biomedikuntzaren eta energia berriztagarrien sektoreekin lotutako ikerketa-esparruan egindako lana ikusi ahal izan zuten.

Nafarroako Gobernuaren Nazioarteko Garapeneko Zuzendaritza Nagusiak "Brain Flow" proiektuan bazkide moduan parte hartzen du, Europako beste zazpi eskualderekin batera: Overjissel eta Gelderland (Holanda), Varmland (Suedia), Hedmark (Norvegia), North Rhein Westfalia (Alemania), Nemunas (Lituania) eta Basilea (Suitza).

Interreg IVC Europako ekimenak eskualde horiei 3,5 milioi euro eman zizkien 2010-2013 aldirako, eta kopuru horretatik 600.000 euro Nafarroari dagozkio. Kopuru horretatik %75 EGEF funtsekin ordainduko da, eta beraz, Foru Komunitateak 450.000 euro jasoko ditu proiektu honetan parte hartzeko.

Parte hartzen duten eskualdeek talentua, giza kapitala eta berrikuntza erakartzearen esparruan garatutako eginera onak bateratzen dituzte, gerora neurri horiek gainerako eskualdeetan ezarri ahal izateko. Esperientzia-truke hori sei hilerik behin egindako bileretan egiten da, eta seihileko honetan Iruñeari dagokio ekitaldiaren anfitrioia izatea.

"Brain Flow" programaren helburua talentuaren erakarpena hobetzea da, eskualde periferikoetan edo metropoli handiak ez dituztenetan. "Brain Flow" "miniprograma" proiektuaren tipologiari dagokio, hau da, berezko azpiproiektuen deialdiak ditu, eta horietara talentua erakartzearen inguruan interesa duten Nafarroako Gobernuko departamentuak, erakundeak eta nafar enpresak aurkez daitezke.

Iruñean egindako bileran, ‘Brain Flow’ proiektuaren barruan finantzatutako azpiproiektuak aurkezteko hirugarren deialdia egin zen. Deialdi horretara Nafarroako entitateak eta gainerako eskualdeetako entitateak aurkez daitezke hainbat ekimen aurkezteko, besteak beste hauen inguruan: eskualdeko sektore estrategikoei laguntzeko ekimenak, goi mailako hezkuntza eta eskualdearen erakargarritasuna hobetzea, hori guztia talentua erakartzeari lotuta. Interreg IV C programako beste proiektu batzuetan bezala, azken helburua izango da eskuratutako etekinak eta garatutako eginera onak Europako beste eskualde batzuetara eraman ahal izatea.