Nafarroako 23 enpresa aurkeztu dira guztira Ekintzailea XXI Sariaren bosgarren ediziora. Ekimen hori La Caixak sustatzen du, estatu osoko hainbat entitate publiko eta pribaturekin lankidetzan. Modu horretan, konpainia berritzaileen garapena sustatu eta eskualde bakoitzean hazkunde-potentzial handiena dutenak identifikatu nahi dira.

Foru Komunitatean, sari hau hurrengo hauek antolatzen dute: Nafarroako Gobernuak, Nafarroako Enpresa eta Berrikuntzarako Europako Zentroa (CEIN) enpresa publikoaren bidez, La Caixak eta Berrikuntzarako Enpresa Nazionalak (ENISA). Nafarroako faseari dagokionez, sariak datorren asteartean, maiatzak 17, emango dituzte CEINen egoitzan, Berrikuntza, Enpresa eta Enplegu Departamentuari atxikita dagoena.

Ekintzailea XXI Sariak edizio honetan bi kategoria ditu. Hamahiru enpresak "Emprendes XXI" saria eskuratu dezakete. Sari hori bi urtetik beherako antzinatasuna duten konpainiei bideratuta dago (jarduera 2009ko urtarrilaren 1aren ostean hasi badute). Sari horren Nafarroako irabazleak 5.000 euro eta beka bat jasoko ditu, Cambridge Unibertsitateko Ignite Fast Tracking Innovation ikastaroan parte hartzeko.

Beste hamar enpresa '"Creces XXI" kategorian aurkeztu dira. Kategoria honetan, bi eta zapi urte bitartean lanean ari diren enpresak sartzen dira (hau da, 2004ko urtarrilaren 1a eta 2009ko urtarrilaren 1a bitartean lanean hasi diren enpresak). Irabazleak Executive Growth Program programan sarbidea izango du (trebakuntza-programa hazten ari diren enpresentzat, ESADEk eta IESEk ad hoc pentsatutakoa), baita berrikuntza teknologikorako zubia ere Silicon Valleyn. Horrez gain, irabazleak kategoria honetako azken fase nazionalean parte hartuko du, beste autonomia-erkidego batzuetako irabazleekin batera.