Burlatako Ibaialde institutuak Euroscola lehiaketaren Nafarroako fasea irabazi du aurten. Zentroak lehiaketan hiru ekiporekin parte hartu du, eta sailkapeneko hiru postuak eskuratu ditu. Horrez gain, talde irabazlea bigarren gelditu da fase nazionalean, eta beraz, Estrasburgora joango da datorren ikasturtean, Europako Parlamentua ezagutzeko eta Europako Erkidegoko herrialde guztietako gazteekin batera ganberaren bilera baten simulazioa egiteko.

Miguel Sanz Nafarroako jarduneko Lehendakaria ikasle irabazleei sariak emateko ekitaldiaren buru izan da ostegun honetan. Ekitaldia Nafarroako Jauregiko Tronu Aretoan egin da, eta Lehendakariaz gain, Álvaro Miranda bigarren presidenteordeak eta jarduneko Ekonomia eta Ogasun kontseilariak; Alberto Catalán jarduneko Erakundeekiko Harremanetarako kontseilariak eta Gobernuaren eledunak eta María Isabel Mateo Europako Parlamentuaren Espainiako Informazio Bulegoko Hezkuntza eta Gazteria arduradunak parte hartu dute.

Euroscola Europako ganberak antolatutako lehiaketa da. Hamazazpigarren edizio honetan, boluntariotzaren Europako urtearekin bat eginez, lehiaketaren gai nagusia boluntariotza izan da. Jolas interaktiboen bidez, gazteak kontzientziatu nahi izan dira boluntariotzak gizartearen garapen kultural, politiko eta ekonomikoan duen garrantziaren inguruan, eta gazteei gogoeta eginarazi nahi izan zaie Gobernuz Kanpoko Erakundeek (GKE) eta horietako boluntarioek egiten duten lanaren inguruan.

Lehiaketa 15 eta 18 urte bitarteko gazteei zuzenduta dago eta www.euro-scola.com web helbidearen bidez garatu da, bi ataletan. Lehenengo fasea otsailaren 14tik martxoaren 25era izan zen, eta parte-hartzaileek ikasgelan planteatutako gaiari buruz eztabaida egin dute eta beste ekipo batzuek gerora baloratu behar izan dituzten materialak sortu dituzte. Azken proba martxoaren 28tik apirilaren 14ra egin zen, hasierako fasean ikasitakoa berrikusi eta ebaluatzeko.