Hezkuntzako jarduneko kontseilari Alberto Catalan Higuerasek, gaur goizean, Nafarroako ikastetxeetan 2010-2011 ikasturtean antolatutako euskarazko lehiaketei dagozkien sariak banatu ditu Nafarroako Jauregiko Tronu Aretoan. Ekitaldian, Catalanekin batera, Antolamendu, Kalitate eta Berrikuntzako jarduneko zuzendari orokor Teresa Aranaz Jimenez izan da.

Ekitaldiaren hogeita bigarren edizio honetan, guztira 30 sari banatu dira ondorengo modalitateetan: poesian (sei sari); narratiban (sei); "Pedro Diez de Ulzurrun" deklamazio-lehiaketa, irrati-gidoia eta pod-castetan (lau accesit); "José María Satrustegi" etnografia-lehiaketan (sari bat) eta bertso-idatzian (hamabi sari).

Saritu bakoitzari honako hauek eman zaizkio: diploma bat, garaikur bat, saritutako obren DVD bat eta sariaren bonua (100 eta 175 euro artekoa narratiban, poesian eta bertso-idatzian, eta 350 euro artekoa deklamazio, irrati-gidoi eta bideo-grabazio modalitatean, non lanak taldekakoak diren).

Lehiaketa ezberdinetan 1.494 lan aurkeztu dira, guztira, eta lan horietatik 308 narratiba modalitatekoak izan dira; 153 poesiakoak; 1.015 bertso-idatzitakoak; 15 deklamazio, irrati-gidoi eta podcast lehiaketari dagozkion ikasle-taldeek egindako grabazioak dira; bi bideo-grabazioak dira eta beste bat etnografia-lan bat.

Saritutako ikasleak Nafarroako 15 ikastetxetakoak dira. Zehazki, ondorengo ikastetxetakoak: Alaitz (Barañain); Toki Ona eta Labiaga (Bera); Auritz (Auritz); Baztango ikastola (Elizondo); Andra Mari (Etxarri Aranatz); Orreagako Ama (Garralda); Erleta eta Amazabal (Leitza); Tantirumairu eta Irain (Lesaka); Eunate (Iruñea); Garcés de los Fayos (Tafalla); Monte San Julian (Tutera); eta Paz de Ziganda (Atarrabia).