Gizarte Politika, Berdintasun, Kirol eta Gazteria Departamentuko kontseilaria den Elena Torres Mirandak gaur Valtierran adierazi du denok ahalegindu behar dugula "kalitatezko zerbitzuak eskaintzen jarraitzen, baina egungo egoerara egokitu behar direla, ez baita erraza". Era horretan, gogoratu du kontseilari moduan gizarte-politikekiko duen konpromisoa, "betiere, aurrekontua zorrotz begiratuta eta kontuek aukera ematen diguten heinean".

Horrela azaldu du Elena Torresek Erriberako herri horretako San Jose egoitzan egindako hitzaldian. Ekitaldian, AENORrek Nafarroan duen zuzendariak, Emilio Flamariquek, Egoitzako zuzendaria den Eduardo Mateori, ISO 9001 ziurtagiria eta zentroko Zerbitzuen Kartaren AENOR ziurtagiria eman dizkio.

Elena Torres kontseilariak instalazioak eta bertan ematen diren zerbitzuak goraipatu ditu. Halaber, egoitzak egindako apustua nabarmendu du; hau da, zerbitzuen kartarekiko konpromisoa hartzea, "garbi utzi baitira kudeatzen duen Fundazioaren ezaugarriak diren konpromiso batzuk, hots, arreta osoa eskaini nahi die adineko pertsonei, eta, gainera, etxeko edo hurbileko giroan eta giro atseginean". Testuinguru horretan, azpimarratu du zerbitzuen kartak erakunde publikoetan nahiz pribatuetan sartzea "gardentasun-ariketa eta errealitatera eta erabiltzaileen premietara hurbiltzeko ariketa dela".

Jakina denez, AENORrek bere ziurtagiriarekin ziurtatzen du egoitzak betetzen dituela ISO 9001 Arauan ezarritako baldintzak, eta kalitatezko kudeaketa-sistema ezarri duela, etengabeko hobekuntzaren aldeko apustua egite aldera. AENORrek zerbitzuen kartetarako ematen duen N ziurtagiria Espainiako UNE 93200 arauan oinarritzen da, eta egoitzak duen konpromisoa ziurtatzen du; alegia, erabiltzaileei eskaintzen dituen zerbitzuen eta zerbitzu horiek ematerakoan bere baita hartzen dituen konpromisoen berri ematea.