Nafarroako Gobernuak Nafarroako Kanaleko zona ureztagarria Erdiko zonako eskualde berrietara zabal daitekeen aztertuko du, eta, horretarako, bideragarritasun teknikoa, ingurumen-arlokoa eta ekonomikoa baloratuko ditu.

Horrela jakinarazi du gaur goizean Landa Garapen, Industria, Enplegu eta Ingurumen Departamentuko kontseilariak, Lourdes Goicoecheak, Andosillako Udaleko ordezkaritzarekin, Manuel Teres alkatea buru zutela, bildu eta gero. Lan-saioan, Landa Garapeneko zuzendari nagusia den Jesús María Echeverríak ere parte hartu du. Hitzordua Andosillako udalerriak eskatu zuen, ureztatze-soroak eta lehorreko lurrak Nafarroako Kanaleko ureztatze-zonan sartzea eskatze aldera.

Andosillak, batetik, ureztatze tradizionaleko zona bat du, Ebro ibaitik hartutako urarekin erruz ureztatzen duena, eta, bestetik, ureztatze altxatuko zona, neguko ureztatzeak bakarrik egiteko aukera ematen duena. Itoitz-Nafarroako Kanalarekin lotuz gero, egungo ureztatze-sistema hobetuko litzateke, kostu energetikoak murriztearekin eta ur-emaria urte osoan izatearekin batera.

Halaber, topaketan, Andosillako Udaleko ordezkariek Goicoechea kontseilariari jakinarazi diote udalerrian industria-zoru berriaren premia dagoela eta inguruko hornidura elektrikoa hobetu beharra dagoela.