Bestalde, irailaren 22ko osoko bilkuran Fundazioaren Patronatuan Nafarroako Parlamentuaren ordezkari izango diren bost kideak izendatu zituzten. Carlos García Adanero (UPN), Maribel García Malo (UPN), Carmen González García (UPN), María Victoria Arraiza Zorzano (PSN) eta Juan José Lizarbe Baztán (PSN).

Erakunde sustatzaileek proposaturiko nagusiei dagokienez, Nafarroako Gobernuak, iragan irailaren 28an, Patronatuko hiru kide izendatu zituen, Unión del Pueblo Navarro alderdiari (Lourdes Goicoechea) eta Nafarroako Alderdi Sozialistari (Anai Astiz Medrano) dagozkienak; horiek organoan Gobernuko  kide gisa jarraitzen duten Yolanda Barcina eta Roberto Jiménez ordezkatzen dituzte. Nafarroako Unibertsitate Publikoaren ordezkari Julio Lafuente López izendatu da.

Nagusi berriak aurkeztu ondoren, Marta Vera Janín Gobernu berriko Osasun kontseilari eta aurreko Patronatuan arlo pribatuko ordezkaria zenaren uko egitea onartu da. Horren ondoren, entzute handiko profesional eta enpresarien artetik kide berri bat izendatu da, Juan Manuel Gorostiaga Ayestarán Mutua Navarrako zuzendari kudeatzailea. Gauzak horrela, MODERNA Fundazioaren Patronatua osatu da.

Gogoratu, Patronatua hogeita hamar kidek osatzen dute, eta horietatik hamabost instituzio publikoek izendatzen dituzte eta beste hamabost sustatzaileak diren enpresa eta erakunde pribatuek.

Jarraian, Fundazioko Batzorde Iraunkorreko kideak berritu dira. Batzorde horren helburua MODERNA Plana etengabe bultzatzea da, Patronatuaren ildoen arabera garatzen dela bermatuz, eragile partaideen jarraipen eta koordinazio funtzioen eta, batez ere, Planari loturiko politika publikoen bidez.

Osaerari dagokionez, Batzorde Iraunkorra hemeretzi kidek osaturiko kide anitzeko organoa da. Horietatik bi Nafarroako Gobernuak izendatu ditu: Batzordearen presidentea den Álvaro Miranda Simavilla bigarren presidenteorde eta Ekonomia eta Ogasun kontseilaria eta Roberto Jiménez Alli  lehen presidenteorde eta Lehendakaritzako,  Administrazio Publikoetako eta Barneko kontseilaria. Batzordeko beste bi kide, Carlos García Adanero eta Juan José Lizarbe Baztán, Nafarroako Parlamentuak izendaturiko bost nagusien artetik hautatu dira.

Bestalde, zazpi kide erakunde sustatzaileen ordezkariak dira: bi kide politikaren alorrekoak dira (UPN eta PSN), beste bi hezkutzaren alorrekoak (UPNA eta NU), beste bi sindikatuetakoak (UGT eta CCOO) eta beste bat enpresen arlokoa (CEN). Gaurko bileran erakunde sustatzaileen ordezkarien hiru kide berritu dira, hau da, UPNk eta PSNk izendaturiko Lourdes Goicoechea Zubelzu eta Anai Astiz Medrano, hurrenez hurren, eta Alfonso Carlosena García Nafarroako Unibertsitate Publikoaren ordezkaria.

Azkenik, Batzorde Iraunkorreko zazpi kide enpresari eta profesionalen ordezkariak dira; horietatik bat, Juan Manuel Gorostiaga Ayestarán, Marta Vera Janín Osasun kontseilariaren ordez ere izendatu dute gaur. Amaitzeko, María José Ballarín Domeque Fundazioko presidenteordea, iragan martxoan aukeratu zutena, Batzorde Iraunkorreko kide naturala eta presidenteordea da.

Nafarroako garapen ekonomikorako eredu berria

MODERNA Plana eta horren garapena kudeatzen duen fundazioa joan den martxoaren 9an egin zen ekitaldi publiko batean aurkeztu zituzten, Iruñeko Baluarte Biltzar Jauregi eta Auditorioan.

Fundazioa eratu eta MODERNA Plana abian jarri ondoren amaitu zen 2008an egiten hasi ziren plan estrategikoa. Honako hauek izan dira plan estrategikoaren sustatzaileak: UPNren Nafarroako Gobernua, PSN, Nafarroako Enpresaburuen Konfederazioa, UGT eta CCOO sindikatuak eta Nafarroako bi unibertsitateak, Nafarroako Unibertsitate Publikoa eta Nafarroako Unibertsitatea. Horiez gain, bi urte baino gehiagoz 5.000 lagun baino gehiagoren ekarpenak bildu dituzte. Plana 2010eko ekainaren 21ean onetsi zuten erakunde sustatzaileek. Bestalde, Nafarroako Gobernuak ekainaren 28an onetsi zuen Plana eta, ondoren, Nafarroako Parlamentuak onetsi zuen 2010eko urriaren 1ean egindako osoko bilkuran % 76ko babesa izan ondoren. UPN, PSN, CDN eta IUren aldeko botoak jaso zituen eta NaBairen kontrakoa.

MODERNA Planaren asmoa datozen hogei urteetan Nafarroako garapen ekonomikoaren ereduaren aldaketa sustatzea da osasunaren ekonomia, ekonomia berdea eta talentuaren ekonomia oinarri hartuta. Nafarroa da Espainian ezaugarri horiek dituen plana abian jarri duen lehenengo autonomia erkidegoa. Plana egiteko funtsezkoak izan dira herritarren partaidetza eta instituzioen adostasuna eta hala izango dira plana garatzeko ere. Nafarroan ekonomia berri bat sustatzea du helburu planak eta, horretarako, datozen hogei urteetan foru erkidegoak bete beharreko erronkak, metodologia eta ardatz nagusiak zehazten ditu, baita esparru bakoitzerako helburu zehatzak eta 458 ekintza ere.

Hauexek dira Moderna Planaren helburu nagusiak: oparotasun handiagoa lortzea eta, hala, Nafarroa biztanleko BPGren eta aberastasunaren bidezko banaketaren Europako eskualdeen zerrendan hasierako hogei eskualdeen artean izatea, giza garapen handiagoa lortzea eta Nafarroa, Giza Garapenaren Adierazleari (GGA) dagokionez, Europako lehen hamar eskualdeetako bat izatea, horretarako kalitate handieneko osasun laguntza eta hezkuntza sistema bikaina eskainita eta ingurumenaren iraunkortasuna areagotzea eta parametro horretan Nafarroa Europako lehen hogei eskualdeetako bat izatea.