Era horretan, Herri Lanetako zuzendari nagusiak azaldu duenez, egoera pribilegiatuan geratzen da maila nazionalean nahiz nazioarteko mailan; izan ere, kontuan hartu behar da bereziki merkantzietarako prestazio handiko korridore bat dela, baina baita bidaiarientzat ere. Hala, Nafarroa puntu estrategiko batean geratzen da maila nazionalean eta nazioarteko mailan merkantzien jarioari eusten dioten ardatzen artean.

Gainera, azpimarratu du, trena etorkizuneko motor nagusietako bat dela, eta merkantzien tren bidezko garraioa oraindik ustiatzeko dagoela Espainian. Herrialde honetan merkantzien garraioa % 3a da; Europar Batasunean, berriz, % 15a. Hori dela eta, korridorea pizgarri izango da jada badauden inbertsioak finkatzeko eta beste batzuk bereganatzeko, eta horren ondorioz enplegua sortuko da.

Azkenik, jarraitu du, Nafarroan barneko nahiz kanpoko turismoa (Europako gainerako herrialdeetatik) handitzeko aurreikuspena dago.

Bestalde, Garraioetako zuzendari nagusi Berta Mirandak azpimarratu duenez, merkantzien garraiorako egun errepidearekiko dagoen menpekotasunak lehiakortasunean eragin txarra du, esportazio eta inportazioetan bereziki. Horregatik, Abiadura Handiko Trena eraikitzeak lehiakortasuna hobetzea ekarriko dio Nafarroari, merkantzien errepideko garraioaren aurrean (ibilgailuz beteta dauden errepideak).

Gainera, erantsi du, abiadura handiko trena garraiobide modernoa eta eraginkorra da bidaiari nahiz merkantzientzat, eta iraunkorra; izan ere, garbiagoa da ingurumenean duen eraginari dagokionez, elektrizitatea bakarrik erabiltzen baitu (gero eta gehiago energia berriztagarriekin sortzen dena), eta trenek balaztei eragitean ere elektrizitatea sarera itzultzen duten sorgailu gisa funtzionatzen dute.

Berta Mirandak nabarmendu du, halaber, Nafarroako tren-korridorea Kantauri-Mediterraneoko ardatzean sartzeari esker, eta bide-sarearekin elkar lotuta, beste garapen logistiko batzuk egingo direla Tutera eta Noain-Iruñeko nodo logistikoetan aurreikusitako bi terminal intermodaletatik abiatuta bereziki. Ez da ahaztu behar, Kantauri-Mediterraneoko ardatzak (Valentzia, Aragoi, Errioxa, Nafarroa, EAE eta Kantabriako autonomia erkidegoak zeharkatzen ditu) bertan dauden portuak, ekoizpen-zentroak eta biztanleak lotzeaz gain, Mediterraneo, Atlantikoko korridoreekin eta korridore Zentralarekin elkartzen dituela ere; aldi berean, mugaren bidez merkantzien Europako korridoreekin erlazionatzen da.

Horregatik, Berta Mirandak adierazi duenez, Abiadura Handiko Nafarroako Korridorea eraikitzeari esker, "beste garapen logistiko batzuk sustatu ahal izango dira, Nafarroaren barnean garraio-sistema bat antolatuz sistema nazional eta europarrarekin lerrokatuta; era horretan, gure ekonomiak eraginkortasun eta iraunkortasun handiagoa izango du".