Nafarroako Gobernuak eta Nafarroako 14 mankomunitate eta udaletako euskararen udal zerbitzuek "Euria ari duenean" argitalpena aurkeztu dute gaur Iruñean. Argitalpena haurrentzako euskarazko bilduma da, Leire Salaberria gipuzkoarrak idatzi eta irudiz hornitu duena.

Argitalpena Maximino Gómez Euskarabideko zuzendariak, Maitane Suarez Burlatako Udaleko zinegotziak, Etxepare sariaren antolatzaile diren euskararen udal zerbitzuen izenean, Pello Elzaburu Pamiela argitaletxeko ordezkariak eta Leire Salaberria lanaren egileak aurkeztu dute.

Lana garaile atera zen Etxepare Sarietan. Saria euskara zerbitzua daukaten hainbat tokiko erakundek antolatu eta Barañaingo, Baztango, Berriobeitiko, Berriozarko, Burlatako, Lizarrako, Uharteko, Garesko eta Zizur Nagusiko Udalek, Bortzirietako eta Nafarroa iparraldeko euskararen mankomunitateek, Malerreka eta Sakanako mankomunitateek eta Erronkari eta Zaraitzuko Batzar Nagusiek ordaindu dute.

Iñaki Agirrezabal, Jon Zabaleta, Mikel Valverde eta Patxi Zubizarretak osaturiko epaimahak azpimarratu zuen obrak ‟eguneroko errealitatea beste ikuspegi batetik erakusten duela; hodeiak eta euria maiz tristurarekin eta umore txarrarekin bateratzen badira ere, argitalpenean optimismoz eta fantasiaz adierazten dira. Horregatik azaltzen dira kaleetan nahasten diren koloretako aterkiak, hezetasuna atseginez hartzen duten barraskiloak, berdetzen diren zuhaitzak, etab. Liburuaren narratzaileak egun euritsuez gozatzen du, aitak kotxez eramaten duelako eskolara, plisti plasta ibiltzen delako bota politak jantzita eta putzuetan irudizko arrainak harrapatzen dituelako. Konposizioa jolasean ari da testuaren eta irudien arteko orekarekin. Kontaketaren lirismoak, hitzak eta irudiak inguratzen dituen giro magikoak irakurleei enpatia sentiarazten diete eta hunkitu egiten dituzte. Eta egun euritsuek argi urri eta ahula izan arren, egileak liburuaren orrialdeak kolorez eta kontrastez betetzen ditu, eta horiek poztasuna eragin eta nekeetan irria ezpainetan jartzera bultzatzen dute.