Nafarroako Gobernuak osorik finantzatuko du, 500.000 euro inguruko aurrekontua duen Fiteroko mediku-kontsultategi berriaren eraikuntza.

Horrenbestez, Erriberako udalerri honek oraingoa ordezkatuko duen mediku-zentro berri bat izango du 2013an. Egun dagoena txiki geratu da udalerriko 2.200 biztanleak artatzeko; horri gehitu behar zaio irekita dagoen aldian bainuetxea okupatzen duten 900 bat pertsona, hau da, ia urte guztian (abenduaren 20tik urtarrilaren 20ra soilik ixten ditu ateak).

Osasun Departamentuko kontseilariak egungo mediku-kontsultategia bisitatu du gaur, eta harekin batera izan da Nafarroako Osasun Zerbitzuko zuzendari-gerente Angel Sanz ere, eta eraikin berria kokatuko den lursailetara hurbildu da.

Mediku-kontsultategian egiten dute lan Luis Castiello medikuak eta Ana Cornago erizainak lanaldi osoz; Santiago Martínez medikuak eta María Fernanda González erizainak, berriz, lanaldi erdiz. Lan-taldea honako hauek osatzen dute: Ana Isabel Lacarra administrariak, Castejónen eta Cintruénigon ere zerbitzuak betetzen dituen gizarte langile Mercedes Montoriok, Edurne Ciriza pediatrak eta pediatriako erizain Susana Roncal-ek, Cintruénigoko alboko udalerriarekin partekatzen dutena.

Bisitaldia mediku-kontsultategi berria egingo den lursailetik egindako ibilbide batekin amaitu da, udalerriko udal-pilotalekuaren alboan daudenak. Fiteroko Udalak 500 metro koadroko orube bat laga du eraikina egiteko, 438 metro koadro inguruko azalera erabilgarria izango du eta honako areto hauek izango ditu: medikuntzako bi kontsulta eta erizaintzako beste bi; pediatriako kontsulta bat eta pediatriako erizaintzako beste bat; eta bi lanposturentzako administrazioko gune bat.