Birziklapenarekiko konpromisoa

Guztira, Nafarroan 278 enpresak laguntzen diote ontziak birziklatzeko kateari Puntu Berdea izenekoan parte hartuz; era horretan, merkatuan jartzen dituzten ontziak birzikla daitezke haiek hondakin bihurtzen direnean.

Haietatik, legez prebentzio-plan bat egitera behartuta dauden 59 enpresak egin dute. Horren emaitza da, 153 neurri hartu direla hondakin gutxiago sortze aldera merkatuan ontziratutako produktuak jartzeagatik. Neurri horiek ontzien garrantzia murrizteko hartu dira bereziki, eta baita material birziklatuak erabiltzeko, berrerabilpena handitzeko eta ingurumenean eragin txikiagoa duten ontziak erabiltzeko ere.

Esparza kontseilariak adierazi duenez, "datu horiek adierazten dute inplikatuta dauden eragile guztien konpromisoa (herritarrak, Udalak, Mankomunitateak, enpresak, Nafarroako Gobernua eta Ecoembes) Foru Komunitatean egunez egun `birziklapenaren gizartea´ izenekoa finkatu eta areagotzeko" eta azpimarratu du Nafarroan urte askoan egindako ahaleginaren emaitzak direla.

Ecoembes-ko korporazioko komunikazio-zuzendari Antonio Barrón-ek nabarmendu duenez, birziklapenaren bidez herritarrek gure ingurunea babesteko era aktiboan parte hartzen dute. Alde horretatik, herritarrei gonbita luzatzen die sistema horretan parte hartzen jarrai dezaten, eta gogora ekarri zien "keinu sinple batekin, gaikako bereizketarena, ontziak zabortegi baten buka dezaten ekiditen dela, era horretan energia-kontsumoa murriztuz eta negutegi-efektuko gas-isuriak murriztuz. Gainera, hondakin horiek herritarrentzako produktu erabilgarri berrien lehengai gisa balia daitezke".

Estatu-mailan, ontzien % 68 birziklatzea lortu da, hau da, merkaturatzen diren 10 ontzitatik 7 birziklatzen dira; datu horrek Europako Batzordeak jarritako helburuak nabarmen gainditzen ditu, 13 puntu baino gehiagotan (% 68 % 55aren aurrean).